Twins昨日在旺角朗豪坊為一專售HelloKitty服裝的時裝店剪綵，兩位成員更穿上該店提供的服裝出席，但近日盛傳與方力申情變的鍾欣桐竟倒米說：「我鍾意米奇老鼠。」
女子組合Twins昨日到旺角朗豪坊，為專售HelloKitty服裝的時裝店KILARA新店開幕擔任剪綵嘉賓，大會除邀請模特兒上台行catwalk外，蔡卓妍（阿Sa）還穿上HelloKitty的娃娃上衣、鍾欣桐（阿嬌）則穿了同品牌的白tubetop及牛仔短裙，頓時增添幾分嬌俏。
自知失言
及後問Twins有否儲HelloKitty物品的嗜好？阿Sa說：「佢陪住我哋成長，都有儲少少嘢嘅，其實我乜都儲，以前慳埋啲零用錢就愛嚟買筆同簿。」近期備受與方力申情變傳聞影響的阿嬌竟突然說：「我冇乜儲呀，我鍾意米奇老鼠嘅。」語畢阿嬌即自知講錯話，馬上補鑊說：「我細妹鍾意HelloKitty㗎。」
又問Twins曾否試過獲男同學送公仔？阿Sa說：「我鍾意男仔有心思啲，自己整嘢，以前係窮拖友，冇錢買嘢。」阿嬌則稱：「兩個人一齊，唔使買嘢都開心嘅。」阿Sa直言現今仍保留舊愛的情信，亦不擔心情信被公開，她說：「唔驚，拍拖係咁㗎啦，邊個冇拍過拖呀？一定好肉麻㗎啦。以前有個英國男朋友，大家互相通信都交往咗兩年。」至於目前有否收男友情信，阿嬌即搶說：「都話𠵱家冇男朋友咯，重追問？」
分享情信
不過，問阿Sa會否擔心保存舊愛情信令男友呷醋？她只說：「唔知呀，如果要呷醋都幫佢唔到。」阿Sa又稱不會在男友面前炫耀舊情信，但曾試過與朋友分享情信，最後問Twins現任男友是否浪漫，阿Sa即耍太極說不知道，阿嬌則沒有作答。
採訪：胡比 攝影：仇志德
