早前話自己好似做咗十年立法會議員嘅湯家驊認真多產，轉吓眼，過去一年又寫咗多篇文章，最近重結集成書，搵咗華叔、廖長城同董橋寫序，準備喺六四期間推出。
本書個名叫做《從釋法那一天開始……》，湯大狀下半生人嘅轉捩點在於中央一次又一次釋法，搞到當年誓言旦旦話不問政治嘅大律師公會主席冇得揀，由上街、成立關注組到參加立法會選舉，都係湯大狀從未想過要做嘅，而佢所恃嘅，據說就係掛喺心中嘅一把公義之劍。
湯狀同八方講，舊年可能議題多，所以文章亦寫得特別多，佢覺得既然從政，就唔應該錯過任何一個發表意見嘅機會，而以前佢出書，主要係送畀學校，𠵱家就希望可以賣多啲畀市民，至於簽名會，就唔搞啦。
八方問湯狀點解搵行會成員廖長城作序，佢話因為係大學同學，有相為證，考吓大家眼力，廖議員當年頭髮好多，另外陳景生、鄭慕智以及湯太都係同屆（六九年）法律系同學，唔知大家認唔認得出？
爆料熱線：29290000、27860099
報料傳真：26239278
報料電郵：[email protected]