恒指是日高低差幅49點，繼續浪費炒家青春，成交金額連99億元都唔到。好淡其中一方只要用多幾分力，個市就會有較明顯發展。暫時比較多人睇淡，不過通常集體智慧最後證明係錯嘅。
太AC輪3509：平淡市中，太A（019）爬高兩格，只係上移0.8%，太AC輪3619就彈升20%，坐咗第4大升幅個位，交投好似好勁，有15球以上，計落金額唔夠1球，因為輪價細。3619下月尾到期，輪價6.7仙，溢價5%，槓桿率96倍（有效27.3倍），引伸波幅19%。幾個仙1份，10兌1即係幾毫子，即控制價值64.25元嘅股票，大有刀仔鋸大樹嘅味道，不過炒呢類輪，要預咗連樹仔都鋸唔掂，鋸仔先斷。
真係睇好太A，買C輪3509比較實際，隻輪成交金額4.6球，要止蝕散水都易好多。
恒指C輪3717：如果認為個市靜靜吓會忽然向上彈一彈，短炒一轉，博兩餐茶，搵恒指C輪，最好揀溢價低者，寧可槓桿率低啲，例如3717。隻輪下月尾夠鐘，輪價8.8仙，溢價0.9%，槓桿率31.2倍（有效22.8倍），引伸波幅14%。睇淡，買P輪，注碼唔大嘅話，則揀3884。
章盛