有政壇橋王之稱嘅許仕仁今次披甲上陣，為老友煲呔助選，一則為挽回公務員聲譽，拯救特區於水火之間；二則為自己完成人生大業，做到一人之下嘅政務司司長，過足官癮。
當然識許老爺嘅人都知道，佢身體大不如前，成日要去銅鑼灣白沙街睇神醫，執番兩劑番屋企煲藥食；而煲呔亦唔好得佢好多，晚晚捱更抵夜，曾太瞓咗幾覺佢重喺度睇文件、發email，吩咐大家要做乜做物，都唔可以話係優差。
所以平心而論，除咗要光宗耀祖有啲私心，煲呔同許老爺（肥龍）都算係有心人，想為香港做啲嘢嘅。
煲呔嘅強項就係夠晒忠心，邊個係佢老細佢都會聽點，做到最好為止，唔理你係大英帝國、英女皇，抑話係中華人民共和國同廖暉。熟悉情況嘅人就話，中共肯定睇中煲呔呢個「大優點」，所以委以重任，不惜黃袍加身，而八方同香港人就正正最驚呢樣嘢，講真，陳四萬原則比較強，有底線，煲呔就好難講啦，咁中共就最唔講原則，一切為政治服務。
煲呔最好有醒啲，凡事唔好只以中央廖暉是問，都聽吓港人心聲，一國兩制，學吓人哋何厚鏵點巧妙靈活運用，嗰啲陳建平、佳叔式人物，就叫佢執包袱，跟老董去享福。反正老董都冇眼睇，同董太飛咗去美國三藩市小休，見吓啲老朋友，玩吓食吓，有排都未返港。
煲呔要「親賢人、遠小人」
煲呔要「親賢人、遠小人」，而老許學人做丞相位，就要發揮最高智囊同諫官嘅要職，事事為新的特首打點好一切。係人都知佢同民主派有偈傾，以前出名請議員食老正興好嘢，所謂雞髀打人牙骱軟，餐餐都俾佢拆掂，今次助選，佢又搵到兩位前報界阿姐級人馬幫手，一位姓黃，一位姓游，肯定無敵。
噚日一眾行家走晒去灣仔東亞銀行港灣中心尋寶，結果雖然見唔到許老爺，但係都算有收穫，搵到個競選總部地點。許老爺出名迷信，果然嗰重未掛牌嘅心戰室位於二十二樓，取其容易嘅意思，咁冇對手選舉，的確易如反掌嘅。
肥龍拉到李國寶、李業廣同陳德霖幫手助選，金融界嘅票攞盡，金勞詹真係冇啖好食，原本選委會有八百人，不過，由於四位立法會議員包括梁劉柔芬、馬力、黃宜弘以及范太有雙重身份，又係人大代表，又係議員，所以少咗四票。即係話，無論許老爺幾落力，煲呔最多攞到七百九十六票，當然煲呔唔使要晒，有四、五百票就夠啦。
爆料熱線：29290000、27860099
報料傳真：26239278
報料電郵：[email protected]