大市噚日在更窄的幅度內上落，恒指高低相差只49點，相信係有史以來全日交易的最窄幅紀錄（0.35%），恒指收市13719，升20點，成交亦縮到唔夠100億，只得98.3億元，期指低水33點。
短期大市表現受下周一期指結算影響，十個牛皮九個淡，而大市又受制多條平均線壓力，本來偏軟的機會甚大，但大市跌唔落，個人對後市的看法仍較為樂觀，期指結算後應會有較明朗的局面出現。
上升股（不計認股證）有320多隻，泛海系大升，成為市場焦點，最勁係第3代的泛海酒店（292），最高1.22元，收1.09元，大升0.50元，升幅84.7%，成交亦大增到2223萬股。泛海國際（129）高收0.375元，升4.5仙，升幅13.6%；第1代的滙漢控股（214）最高2.70元，收2.50元，升0.25元，升幅11.1%，升得最小。
剛好3個月前，推介泛海酒店，指其資產值同盈利齊升，可以小敲，當時股價0.37元，家吓升幅接近2倍，真係賺到笑。泛海酒店到呢個價，已經過咗位，有貨就回吐獲利，冇貨就不要再追，風險太大也。
反而同系的泛國同滙漢，重有留意價值，特別係滙漢，股價折讓極大，若成為私有化目標，並不令人感到意外。
堡獅龍（592）回落頗多，可以留意。3月初，堡獅龍仍企於2元樓上，家吓回到1.40元水平，跌咗30%，但跌勢已見喘定，係一隻可博反彈，謀小利的對象。
集團主要銷售服裝，包括出口及在香港、內地、台灣同新加坡零售，設有352間店舖，由公司直接管理；另外，在內地有182間品牌特許經營店，而海外市場的南北美洲、歐洲及中東等地則有176間特許經營店。
短線目標1.6元
05年度（3月年結）業績料下月宣布，上半年度獲利6281萬元，比前同期大增20倍，通常下半年度盈利會比上半年度更佳，估計全年盈利1.95億元，升65%，每股盈利12.5仙，以國際零售股仍屬保守的15倍PE計，股價已可見1.85元，短線可以1.60元為目標。集團現年度將致力拓展更多出口市場，盈利可進一步上升。
郭兆誠