由羅素卻爾（RussellCrowe）同雲妮絲惠嘉（ReneeZellweger）兩大巨星合演嘅電影《CinderellaMan》，前晚喺加州嘅環球影城舉行首映禮，近年長期留喺澳洲嘅羅素為咗宣傳新片，重特別帶埋老婆丹妮爾（DanielleSpencer）同埋父母一齊出嚟，為新片造勢。
演拳手打出歷史
至於女主角雲妮，自然亦係全場焦點之一，佢自早前同鄉謠男歌手KennyChesney結婚後首次出席公開場合，身穿紅色晚裝嘅佢當日雖然冇老公陪伴，不過面上仍然流露甜蜜幸福嘅笑容，影迷叫佢簽名影相佢都有求必應。
呢部新片其實係羅素繼奧斯卡得獎電影《有你終生美麗》後，第二度同金像導演朗侯活（RonHoward）合作，佢喺戲入面扮演真有其人嘅一代傳奇拳手JimBraddock，呢位拳手出身紐約低下層，不過佢憑住堅毅意志同老婆嘅大力支持，克服重重困難，重喺一九三五年嘅十五回合重量級拳王爭霸戰上，擊敗當時嘅拳王而寫下歷史新一頁，睇呢部片嘅格局，相信都係有心問鼎下年嘅奧斯卡。
暴力運動太可怕
另外，雲妮雖然喺片中飾演羅素老婆，不過佢早排接受訪問，竟然話好討厭暴力運動，佢話：「我睇過當年泰臣咬甩荷利菲特隻耳仔，好得人驚，我非常慶幸自己只係坐喺電視前睇。」
