經濟好番，豪宅購買力強勁，中記話，今個月頭十九日，過千萬嘅豪宅買賣有六百六十五宗登記，已經比上個月整月四百四十四宗多咗五成。
當中，掀起造價疑雲嘅尖沙嘴凱旋門，佔咗五成八，即係三百八十八宗。第二位係薄扶林貝沙灣，佔咗七十八宗。凱旋門上個月賣咗近千伙，本月已登記單位有六百八十八宗。
今個月頭十九日，過千萬物業成交總值達到一百二十五億，中原研究部高級經理黃良昇估計，全月有一千一百四十宗過千萬成交，總值二百一十四億，挑戰九七年七月三百三十二億高位之餘，宗數亦直迫九七年一千六百一十二宗紀錄。
外圍商廈趁旺賣
投資市場交投火熱，唔少二線區物業，業主都趁勢放盤，佐敦上海街二○○至二○二號全幢商住樓，𠵱家連租約搵美記標售，七月十五號截標。
美記高天成話，物業包括地下、閣樓及一至五樓，地舖一千二百四十二呎，閣樓千二呎，一至五樓每層一千呎，合共七千四百四十二呎。地舖由髮型屋同皮鞋手袋店承租。
成幢樓每個月租金收入合共約八萬五千二百元。
今年一月，上海街一三八至一四二號三幢相連舊樓，可建總樓面二千一百呎，以三千八百萬售出，造價可以作為參考。
放售中嘅二線區全幢物業為數唔少，下月截標嘅上海街二七九號樂陞大廈就係其一。
代理行業出現兼併
代理行業出現兼併現象，聽聞，港置最近買入誠信北角和富道分行。港置用咗六位數字，買入包括舖租同夥計十幾人。接收後可以即刻繼續運作做生意，省時又合乎經濟效益。
聽聞，誠信喺行內有一至兩年歷史，專門承造港島區二手買賣，𠵱家喺銅鑼灣禮頓道、西半山、跑馬地都有分行。
另外，港置趁一手樓市開始轉活，日前搞「新盤巡禮考察團」（圖三），睇恒基西灣河嘉亨灣中環示範單位、南豐北角英皇道六三二號，同長實大坑名門，總共有五百人參加。
環保樓有新標準
香港近年愈嚟愈着重環保，唔講唔知，原來香港環保建築協會（HK-BEAM）呢個非牟利機構，成立已經十年，重同一百幢自願受評估物業，做過環境評估工作，總樓面逾六千萬呎。
所有獲得香港建築環境評估法標籤嘅建築物，都改善咗大廈嘅室內環境，以及減少對社區同環境嘅影響等。攞到標籤嘅物業，環保成就得到認同。
協會噚日推出香港建築環境評估法新修訂標準，同時公布第一百幢自願接受評估嘅物業，就係房屋署藍田邨第七及八期。
電郵地址：[email protected]
