薛家燕（好姨）噚日喺將軍澳電視廣播城錄影《百法百眾終極戰》，提到早前節目中討論外籍家庭傭工工作所引起嘅爭拗事件，不嬲有請開菲傭、而且重曾帶過菲傭出嚟開工嘅好姨，就話最緊要係僱傭雙方大家協調喎。
封大利是做嫁妝
馮仁昭知道好姨不嬲對兩個菲傭Natie同科拉桑唔錯，其中廿八歲嘅Natie已經同好姨打咗九年工，好姨最近重成日笑住同人話家有喜事，原來係Natie放兩個月有薪假返鄉下菲律賓嫁人，好姨重送咗封大利是同大堆新衫畀Natie做嫁妝。
好姨又話明Natie辦妥婚事之後，會照樣同佢續約，重歡迎Natie大住個肚返嚟，好姨話：「我好多朋友都話Natie返去兩個月，分分鐘大住個肚返，叫我唔好同佢續約，我同佢相處咗咁耐，都當佢係屋企人，佢嘅年紀都係時候生，佢想生我都會照顧佢。」馮仁昭就覺得好姨份人真係有情有義咯。
蔡依林想吉蒂貓唱國語歌
蔡依林（Jolin）噚日喺台灣出席7-11舉行嘅「HelloKitty磁鐵板蒐集大賽」宣傳，當Jolin睇到獎品係HelloKitty機械人時，即愛不釋手，佢話：「好想直接帶回家。」Jolin原本希望Kitty機械人能現場演唱佢嘅新歌《野蠻遊戲》，不過廠商話畀佢聽Kitty只會唱日本歌手松浦亞彌嘅日文歌，結果佢聽咗有啲失望。
林志玲食甜品促進交流
林志玲最近俾中國一間甜品廠喜多多睇中，以約二百多萬嘅酬金做代言人，林志玲日前重特別去咗內地拍廣告，廣告商重請咗香港嘅攝影師同台灣導演嘅班底嚟拍呢個內地廣告，真係促進咗兩岸三地嘅人才交流。林志玲下個月重要去內地做一連串宣傳活動嚟配合廣告出街㖭。
蕭芳芳最愛武則天
蕭芳芳噚日同老公張正甫及劉兆銘去沙田文化博物館參觀《走向盛唐》嘅文物展覽，芳芳姐話自己好鍾意睇呢方面嘅展覽，而喺唐代之中，佢最鍾意嘅人物係武則天，因為佢係唯一嘅女皇帝，以當時男人為中心嘅時代，係好難嘅事，佢重大讚武則天係好聰明嘅女人。
成奎安勸羅家英休養抗癌
成奎安（大儍）噚日拍中藥產品廣告，大儍話呢個產品佢試食咗個幾月，覺得效果唔錯，所以應承做代言人，大儍話自從去年做咗抗癌治療及經過調理後，𠵱家情況已經慢慢好轉，對於羅家英做完癌症手術即刻開工拍古裝劇，大儍話家英哥如果可以休息一段日子比較好。
吳鎮宇飛擒大咬當閒事
出道以嚟冇乜緋聞嘅吳鎮宇，近日喺內地荔枝園拍《大冒險家》時，俾雜誌影到佢同內地女演員趙榮嬉戲，話佢背住太太飛擒大咬；噚日鎮宇同馮仁昭講，成件事得啖笑，如果自己幫到人哋提高銷量都冇所謂，反正識佢嘅人都明白發生乜事喎。
