港股噚日成交縮至不足100億元，唔知係咪大戶要保留實力，留待下周一期指結算才盡地一煲，定係慳番啲子彈用作認購新股？恒指大牛皮，全日波幅僅49點，收報13719，升20點。
期指結算過後，相信市場焦點會落在新股身上，單係中遠控股、神華能源及交通銀行的集資額，就超過600億元。若果市場對呢批新股反應冷淡，肯定會拖累大市表現。
另方面，若反應熱烈，又可能抽高拆息，令加息陰影再現。睇嚟呢個6月都係淡友贏面較高，而「五窮六絕七翻身」亦好大機會應驗。
新世界中國（917）停牌。市傳新世界發展（017）以每股2.90-2.95元減持2.6億股，套現7.54-7.67億元，作價較供股價2.80元為高，較停牌前報價有6.4-8.3%溢價。配股價一向較市價有折讓，鮮有溢價。新中今次配股有溢價，可能是反映今次配售代理獲授認沽權，若反應欠理想，可按配股價將新中售回新世界發展。
恒基中國（246）被恒地（012）提出私有化後，市場掀起尋寶熱潮，泛海酒店（292）成為被追捧對象，股價大升84.7%至1.09元，連帶泛海集團（129）亦大升13.6%至0.375元，而買盤主要來自野村，同系的滙漢（214）亦升11.11%。遠東酒店（037）及華大地產（201）亦唔執輸，各升13.1%及8.6%。黑客話，泛海酒店就算唔私有化，亦好大機會被收購。
佑威供股似有所圖
供股一向唔受歡迎，但佑威（627）則明知故犯，2供1，每股供0.25元，噚日股價大跌23.3%至0.28元。值得留意是大股東肯全數包銷，持股量隨時由35.96%增至57.18%，可以攞埋絕對控制權，其舉動值得留意。
阿虎