大市沉悶，手多輸錢。暫時最好學吓縮骨打工仔（或官員），盡量避免多做多錯，少做少錯，實行唔做唔錯。唔係咩？正股跌，揸P輪都要輸，輸在溢價收縮，揸C輪當然更加要輸。
新地窩輪：新地（016）收73元，跌0.50元。熱門P輪4765（真係熱門，成交金額21球）收31仙，不升反跌7.5%。由熱變冷嘅C輪4643（真係由熱變冷，個幾禮拜前某日成交金額20球，昨日得番21萬）收32仙，跌8.6%。淡友輸，好友亦輸。
睇淡新地嘅話，買4765，10月初夠鐘，溢價2.9%，槓桿率23.6倍（有效11.6倍），引伸波幅17%。買新地會反彈嘅話，咪搞啲冇乜成交快脆末日嘅，揀4631，7月初到期，輪價39仙，溢價1.2%，槓桿率18.7倍（有效14.3倍），引伸波幅19%。
中移動P輪3761：中移動（941）跌0.10元，P輪3761又係不升反跌，收8仙，跌5%，唔跟正股作正確方向移動。博正股再向下，3761係最佳對象，溢價3.7%，槓桿率33.8倍（有效14.6倍），引伸波幅25%。玩嘢，玩少少算數，當心輪價跟唔貼正股。
章盛