大哥打完電話，第二日又輪到二家姐中吉打電話嚟，但今次佢係約我行街食飯。自從佢嫁咗人，做埋阿媽之後，我哋已經好少一齊通街逛，難得佢有雅興，一於奉陪到底。
行到攰，我哋去咗間出名醉雞翼的餐廳，我同佢講醉雞翼之嘛，好易做啫！「咁你做吖！」「好呀，做咪做！」就係因為一句晦氣說話，讓我左撲右撲搵人教路，結果，如我所料：唔係嘛，咁鬼易！
先將雞翼用粗鹽擦吓背，出水，再用罐頭雞湯煲約5分鐘至9成熟，熄火焗10幾分鐘，取出用冰水拖，等佢啲小肥膏凝固，再放落現成醉雞汁內，加同一份量的紹酒（單浸酒一樣得，多啲酒味啫）至蓋過雞翼，放雪櫃浸4、5小時已好入味！煲完雞翼啲雞湯唔好嘥，整多個上湯娃娃菜，又係另一佳餚。
試驗成功，即時Call老二嚟試食，佢當堂無話可說！只有大讚好味，一大碟俾佢食剩5隻我帶飯，真係激死！（二） 老四小吉