名模周汶錡自從同杜德偉分手後，身邊一直不乏追求者，先後同吳嘉龍、郁姓上海富商同埋台灣國民黨主席連戰寶貝仔連勝文傳緋聞，但近排又傳周汶錡另結新歡，據聞對方重係超級富豪㖭。
上星期五係周汶錡三十一歲牛一，壽星女喺前一晚七點幾由助手陪同下去咗中環萬宜大廈嘅小南國新中華料理，當時佢着咗一件紅波點嘅低胸連身裙，鬼火咁靚咁行入食肆，在場有記者祝周汶錡生日快樂，佢重笑住話：「唔係，聽日至係（生日）吖嘛，我同屋企人食飯啫。」
未見周麗淇
原來周汶錡喺餐廳包房擺三圍，房入面重有一紮神秘鮮花同一袋二袋嘅禮物，大班朋友包括梅艷芳生前經理人王敏慧（Marianne）都有到賀，反而佢細妹周麗淇就未見人，其間商場保安曾經兩度報警驅趕記者，直至十一點，周汶錡至坐朋友吉普車離開。
蔡依林願同周杰倫復合
蔡依林噚日喺台灣出席手提電話宣傳活動，對於星馬傳媒報道周杰倫同侯佩岑情變，重話周杰倫有意追番前女友，蔡依林就話唔排除分手情侶會復合，只要彼此有共識就得喎，言下之意係咪表示可能同周杰倫復合呢？而周杰倫喺上海宣傳時就話三十五歲就會生仔，咁即係重有九年，咁侯佩岑怕且有排等咯。
台灣記者康城被鎖
台灣《蘋果日報》一名記者日前採訪康城影展時，喺Martinez飯店外影相同當地兩名警員發生衝突，警員話記者影到自己，先搶佢部相機，又叉佢條頸，跟住將記者銬上手銬，令佢手腕受傷，重帶佢去附近冇人嘅山區，警員將記者推落車重講英文鬧話「getout」。事後當地警察局同動粗嘅警員向記者道歉，當地警方重話呢個案件將會作為法國警界嘅借鏡。
王力宏台民眼中歌霸
呢個星期六喺台灣將會舉行「第十六屆金曲獎頒獎典禮」，HitFM聯播網噚日公布由網友投票選出嘅「預測得獎」名單，緋聞情侶王力宏同張惠妹同時被選做民意最高嘅「金曲歌王同歌后」。而當晚王力宏同庾澄慶會合頒最佳國語女演唱人獎，如果阿妹得獎嘅話，就會由王力宏手中接過獎座。
