長實麥當勞道豪宅新盤菁英臺，總共得嗰九個單位，上個禮拜將頂層連天台單位招標出售，價高者得。發展商噚日揭標，由香港置業個客，以呎價萬七買到，單位一千零五十二呎，成交價一千七百八十八萬。
香港置業翁銓澤話，買家原本住喺九龍，俾菁英臺嘅名校網打動，先至入市。菁英臺借對面名校聖保羅男女中學個洋名，叫St.Paul'sTerrace。個盤唔使兩個禮拜就賣晒，套現億三。
另一個豪宅盤九龍塘畢架山一號，長實就將樓盤最後一個連平台單位委託港置出售，單位一千四百一十一呎，配合樓盤同樣喺正名校區，向買家送英倫親子遊學團，價值八萬八。長實執董趙國雄，聯同助理營業經理曹皎明，噚日着住一身博士袍扮畢業生，配合番兩個樓盤有名校網嘅主題。
屯門加息重好炒
銀行剛一口氣加息半厘，更表明未來一個月重會再加，即時令住宅交投回軟，業主與投資者減磅套現，但有炒家扒逆水，趁低吸納。
祥益謝澤銘說，一名炒家，過去周末，掃入屯門啟豐園兩個單位，其中一座中層F，四百六十七呎，原業主四月中放盤叫價九十萬，上周銀行宣布加息後，降價至八十五萬，兩日後再降至八十四萬，但該炒家成功壓價至八十三萬八千買入。
該炒家亦以八十六萬二千八百，購入啟豐園一座中層E，四百六十七呎。賣方為炒家，二月中斥七十二萬入市，轉手賺逾十四萬元。
他補充，在加息威力下，屯門區不少業主都肯降價求售物業，買家就趁低入市，令交投增加。
帝景閣九伙拆售
基金出貨成風，新加坡政府投資公司GIC，委託世邦魏理仕，下月初分拆出售半山帝景閣九個豪宅，意向價萬四蚊呎起，若果全部賣晒，估計可以套現四億，比起二○○○年向新地買入價兩億四五，賺六成左右。
呢批貨全部屬於最高層，六個複式，每個二千三至二千八呎，三個頂層連天台花園，最平售三千三萬起，魏理仕方面話，由於單位罕有，唔少買家都打緊主意，包括律師同投資銀行高層。
講開基金散貨，LendLease件豪景閣，都傳話暗盤賣緊。
珀麗灣交投逆市增加
銀行加息，業界指成交減少咗，有啲屋苑重異常淡靜㖭，但亦有例外。美記陸耀光話，馬灣珀麗灣，今個月至今錄得五十二宗成交，但過去周末就佔十五宗，重創出呎價新高。
陸耀光話，二座中層E，八百四十四呎，成交價三百二十萬，每呎三千七百九十一；而一座高層B，九百三十一呎，以四百五十萬易手，呎價四千八百三十四。
佢解釋，因整體呎價仍然吸引，加上市傳發展商有意重推三期貨尾，所以加速買家入市。
中山古玩城再賣
本港好多年前已經興起主題商場，近年內地都仿效，中山三鄉鎮，就有個「巨龍國際古玩博覽城」，係全國最大嘅古典家具同古玩交易中心，分三期發展，總樓面一百六十幾萬呎，第一期一百五十二間舖，舊年沽清，第二期二百一十間舖，賣出逾六成。商場重吸引多國領使參觀㖭。
代理中記話，商場租金回報率可達八厘，而二期部份舖位，唔夠一年已經升值逾一成。
電郵地址：[email protected]
