最近去新加坡的機票實在平，所以住好啲、食好啲都唔肉赤。一個周末只有幾頓晚餐，需要好好安排幫襯邊幾檔老友，因為食一餐少一餐。
先到「茗香」酒家吃福建菜，茗香是老牌食肆，新加坡福建人又多，所以一定地道。魚鰾湯加黑醋，酸酸鮮鮮，胃口打開。不怕膩的話可點一客肥到震的乳豬，皮脆絕，肉鮮嫩。蠔烙有別於一般做法，煎得薄如蝦片，卜卜脆。福建菜無端端又會有潮式煮䱽魚，做法像泰式烏頭或越式生魚，都是吃其鮮味，少油入口清爽。記緊吃福建炒麵，又係加多少黑醋，香港少吃到此味，放入口即覺老友重逢，千杯少。
「文東記」的海南雞其實並不特別精采，但勝在水準平均，最近兼賣燒雞，再加一碟鮮雞雜，灌兩杯薏米水撞青檸汁，入口統統是老友。
「麥仕維」是我最喜愛的熟食中心，海南雞、怡保河粉、魚片湯、各式咖喱、番薯製地道小食，老相好們放滿一桌，冇冷氣所以吃得大汗叠細汗。
夜蒲於Velvet及Zouk後，可以到附近的「新海山」吃田雞雞精，想吃地道的可到「阿華」吃午夜肉骨茶。肉骨茶分兩種，一種是馬來西亞式黑麻麻藥材湯底，另一種是新加坡式的胡椒清湯底。「阿華」賣的是後者，湯中肉香盎然，胡椒作底則少了肥膩感，蘸着老油條加辣椒鼓油膏同吃，似做神仙。食得招積點重可以開罐鮑魚切片放湯，嘩，好味到腳震，不過要百幾溝坡幣一客，一年唔逢一閏，偶然豪一次，冇問題。