香港周街車仔麵檔，配餸多是豬皮魚蛋雞翼尖，吃到厭！「鍾記車仔麵」卻少有地售賣牛鞭、牛心椗、牛彊、牛荔枝等美味牛食。當中的牛鞭，愈是老牛愈粗愈攣愈好味，以後揀餸記得講：「老鞭吖唔該！」
記者：周頌堯
攝影：何家亮
模特兒：Zita、Bonny
老闆風趣鬼馬
「鍾記車仔麵」創辦人鍾振裕老先生，古稀之年樣子只似60多歲，人風趣鬼馬好善談，一見面即捉着記者問：「你猜我多少歲？」「60歲咁上下喇。」「我都話我個樣後生㗎喇，我上深圳，啲大陸妹都話我似40幾歲咋，哈哈。」笑得很老頑童！40多年前，他推木頭車到街邊擺檔，賣魚蛋、豬皮、粗麵、油麵這等簡單不過的食物：「以前街邊推車仔賣『嗱喳麵』，配料好少㗎咋！」到土瓜灣開第一間舖，準備做招牌的時候才靈機一觸想到用「車仔麵」三字做店舖名字，「車仔麵」這家傳戶曉的麵食名字，全靠他一手創立。
嗱喳麵再不嗱喳
現在的嗱喳麵當然再不嗱喳，蔡瀾美食坊的「鍾記車仔麵」更發展至提供約20種麵及50多種配餸選擇，最受歡迎的是牛鞭、牛脆骨、牛荔枝、牛彊與牛心椗等一般麵檔吃不到的牛食，想當年《孤男寡女》劉華吃牛鞭麵偶遇Sammi的一場爆笑戲，那碗牛鞭麵便由鍾老先生提供。問他會否每日一鞭，他依舊風趣：「後生食埋食埋咁多條，𠵱家唔使食咯，我夠補囉、夠強囉，哈哈！」
鞭筋不分至爆笑
何解會用牛鞭當配餸？話說30多年前某日，鍾老先生依舊到街市取貨，把一大盆牛雜取回店舖：「太大盆嘞，啲牛雜又剪得太碎，個牛肉佬唔小心放咗條牛鞭入去，我又唔小心當條牛鞭係牛筋燜。」誰知客人一吃讚不絕口：「既然咁爽口，咪繼續賣囉。」有女食客試過爽口，問屬牛隻何部位：「我話畀佢聽係牛鞭，佢面都紅晒，重怪我做乜煮埋啲咁嘅嘢，不過尷尬還尷尬，好多女仔試過之後都勁鍾意牛鞭嗰份爽口感覺，𠵱家我會用『牛乜乜』嚟介紹牛鞭。」
美味牛鞭確實花心機，先要放入大缸浸水兼沖水3小時，然後放入滾水飛走腥味瘀血，最後才放入秘製醬汁燜︰「條條牛鞭都唔同軟硬，一條4呎長牛鞭，中間開二差不多8呎，起碼燜10小時，燜熟重要熄火焗15分鐘先腍。」
牛鞭麵
牛鞭韌力非常，鍾老先生說：「潮州佬話齋『牛鞭煲爆煲』，韌到可以跳橡筋繩！」老牛老鞭較黑較粗身、切開勁攣多螺旋紋，較韌口但最有牛味；幼牛幼鞭顏色較淺較直身，較腍易入口得多。
（套餐跟餐茶或老火例湯$30）
好味牛配餸
牛脆骨（淨加餸$5）
又稱牛喉嚨，一咬口腔響起連串如爆炸般的卜卜聲，味道似雞軟骨，樣衰但超好味。
牛荔枝（淨加餸$10）
即牛睪丸，口感似豬膶，好考火候，燜不夠時間會水汪汪，悶太耐又會成件散開。
牛彊（淨加餸$5）
即牛頸與膊頭之間的韌帶，口感不俗，同樣火候要拿揑得準，燜過火如嚼橡膠。
牛心椗（淨加餸$5）
即牛心瓣大動脈，一般牛心椗較短小，但「鍾記」只挑選粗厚牛心椗，貪其有咬口。
鍾記車仔麵（31522698）
座位：約100個
地址：黃埔花園第八期蔡瀾美食坊1樓117及118號舖
營業時間：10:00am至10:15pm
