日日放工攰到死，返到屋企成個人都冇晒朝氣，而且中國人就至棹忌屋企黑麻麻死氣沉沉，但將屋企髹到鬼五馬六九彩咁花，搞到眼又花人又暈！計我話玩撞色，兩隻就夠，好似李生同李太咁大廳黃撞綠，罕見又夠生氣。想一年三百六十五日都咁活潑，朝朝早起身都精神奕奕，晚晚返到屋企又活力充沛，就靠晒佢㗎啦！
記者：梁彩燕
攝影：周旭文
設計公司：SpaceDesign（27132973）
（www.spacedesignhk.com）
設計師：Tracie
屋主李生、李太之前住大埔，屋企好有卡通Feel，大廳會放好多公仔擺設，感覺好Fancy好Colorful。但搬到將軍澳後卻轉玩Cyber玩撞色，但都保持住一貫咁色彩繽紛，連家具都成日轉花款，睇嚟屋主都係不甘沉悶的呢！客飯廳牆身髹上一身香蕉黃，特登安排蘋果綠家具同黃牆撞到正，李生同李太異口同聲：「起初都係得個諗字，唔知效果如何㗎，Tracie（設計師）都話我哋好夠膽撞色，諗住博一博咋，但原來都可以做到好好睇，效果又好特別。」
FeatureWall成焦點
論全屋焦點，不得不提電視機後訂做的FeatureWall，頂部嘅弧形設計冇咁呆板，而圓形的窿窿可增加通透感，襯埋42吋Plasma同頂頭射燈，視覺效果更覺豐富。
銀白色會自動隱形
李太阿May話：「多啲色彩，返到屋企零舍有生氣有活力，而銀色電器、玻璃用品同白家具都會好自然咁隱形。眼見的只有黃色綠色，咁眼睛就唔會太花或太逼。」
李生補充：「Tracie亦唔建議我哋響大廳放公仔，因為會影響晒成屋企的風格，變得不倫不類，𠵱家啲公仔都放晒入大型床板下。」除咗大件公仔，鎖碎雜物統統要收得密一密不露出馬腳，以免有礙全屋嘅時代感。
講開時代感，玩CyberFeel又點可以少銀色！所以電視櫃同吊燈至啱Feel，所以客廳天花裝有三盞射燈，分別射向青BBFeatureWall同白梳化後的留白位牆身，凸顯燈光效果，同時亦讓眼睛有休息空間。
吊腳家具易打理
牆身地板家具電器都是新簇簇的，一定係剛入伙冇耐！一問之下卻發現兩人已入住一年有多，屋企重咁新淨，牆身又一啲退色或刮花嘅痕迹都冇，心想清潔工夫實在辛苦了太太阿May。阿May話基本的清潔工序當然不可少，加上得兩個人住其實唔會太難保養或打理，亦全靠裝修前周詳的設想，𠵱家所有家具都採用凌空離地的設計，方便清理家具底的雜物，亦方便使用吸塵機，咁亦冇咁容易積聚垃圾。「啲家具都係採用令面設計，都係焗漆而成，好易打理，用水一抹就得，又唔易刮花，所以望落仍好新淨。」
藍書房太太天下
書房以白色為主，櫃邊、層架及桌面則綴以藍色，放置心愛小擺設及Pekkle鴨點綴，形成一個藍白畫面，全為太太阿May至愛。
為了增加工作空間，設計師盡用窗台位置做成書枱，使細小的書房騰出更多空間。
睡房儲物量驚人
大件小件物品都收到睡房去了，尤其是大型公仔、四季衣裳都多得很，客廳才可變得鬆動。和式睡房起了個木地台，至實用係床底以至可見的地方都是暗格可揭起儲物，而房內的結構性凹位就做衣櫃，地方可謂用到盡。
醒目小常識：窗台下裝鏡防腳印
漆牆靚係幾靚，顏色又多變，但至怕就係玷上污迹難清潔。而窗台對落的牆身更經常被人忽略，其實呢啲位置好易會印上腳印或鞋印，裝塊鏡就一次過搞掂！重可以順便拉闊埋視覺空間，一舉兩得！
