酒莊Ｍ想話試吓開間舖賣酒，特登搭地鐵落銅鑼灣觀察一下，崇光百貨附近嘅東角道，有啲好細間嘅舖位，睇落唔夠一百平方呎，正所謂細細粒容易食，做試點都唔錯啫。於是周圍打聽舖租，唉吔，不打聽還好，一聽就幾乎心臟病發。據探子回報，一間七十二呎舖位，幾個月後租約滿，現租七萬幾。酒莊Ｍ為之面紅紅（啱啱飲完杯紅酒也）、手震震咁話：「點維皮呀，成一千蚊一呎？」探子話：「唔該你飲多一杯，等個心定點，我再講。」酒莊Ｍ一聽，知道唔似有好消息，於是改為飲杯熱茶，無謂太刺激。定一定神，探子再講：「七萬幾係現租，放盤十五萬，過二千蚊一呎，你意下如何？」酒莊Ｍ幾乎連胃裏酒茶都噴出嚟，大聲講：「你估我賣××呀！」
七十二呎，叫租十五萬，都唔知算唔算係市價，醫生Ｃ嘅醫務所就在附近，係自置寫字樓，當年買咗百幾萬，聽完酒莊Ｍ講古仔，不禁唉聲嘆氣：「唉吔，當年死供死供三個舖位，𠵱家都費事做醫生啦，我真眼光短淺！」眾人齊聲呻笨，若時光可以倒流……
左丁山對醫生Ｃ講：「醫生卒之捱到好景啦，報紙話醫管局醫生大逃亡，三百人辭職喎！」醫生Ｃ話：「佢哋出到嚟就知，你估咁易捱呀！買專業保險嘅保險費就好難頂啦，骨科醫生要畀成二十萬呀！」今時今日，做私家醫生確實唔易，新一輩屋邨（中產私人屋邨）嘅醫生，竟然開門開到晚上十時後，夠晒搏命，如果政府應李卓人之要求，訂立最高工時，呢班醫生一定唔肯跟隨。醫生Ｃ教佢哋一條舊橋：做得咁辛苦，有餘錢最好係供番一兩間地下舖位，作養老退休之用！