大市繼續悶蛋，好彩濠賭股表現回勇，令炒即日鮮之徒有番多少細藝，否則長期對住部股票機冇嘢做，好容易會變化石。
濠賭股之中，表現最勁要數世紀建業（079），隻股由復牌以來的0.35元一路直插，最低至0.201元，跌幅確係驚人，但噚日又失驚無神一條氣抽番上去0.265元，大升18.3％，成交股數2.08億股，金額5158萬元。單睇買盤咁硬淨，就知唔簡單。
不過，一向係炒家至愛的中信21世紀（241），噚日忽然腳軟，最低跌至2.275元，收2.425元，跌10.19％，成交股數1656萬股，金額4109萬元。除正股外，公司輪（400）亦跌19.54％，收0.70元。
江湖曾經傳出有人被斬倉，但經紀陳打探過後話並無其事。佢重話中信21世紀炒家後台硬淨，唔愁水源，只係之前炒上3.60元水平供輪時，高位散咗好多，家陣可能係玩震倉，唔排除稍後在低位又會買番轉頭。
慕容小初