下月結婚的杜汶澤和田蕊妮影婚紗照時打破傳統，準新娘更擺出揸煙的甫士。而早前田蕊妮還邀請at17為她寫歌，成員林二汶寫了一首《守望杜田》給她，田蕊妮一邊看歌詞一邊感動到喊。
杜汶澤和田蕊妮將於下月七日在洲際酒店舉行婚宴，據知兄弟姊妹團成員包括車婉婉、應采兒、樂基兒、黃伊汶、鄭中基、余文樂、譚耀文、導演麥兆輝和莊文強。準新人早前拍攝了一輯婚紗照，並找來名攝影師夏永康操刀，杜汶澤不想婚照太公式化，所以兩人除拿着公仔拍照外，田蕊妮更揸煙擺甫士，模仿電影中的角色造型。
談拍拖細節
田蕊妮向來喜歡聽組合at17的歌，一日她碰到at17，即主動上前打招呼兼邀請對方寫歌，at17成員林二汶獻出她第一次的填詞作《守望杜田》，填詞前她問了田蕊妮不少關於她和杜汶澤拍拖的情況，傾談間田蕊妮將兩人拍拖的細節詳告林二汶。
只派薄餅券
田蕊妮說：「結婚係人生大事，我想首歌可以寫晒我嘅心情出嚟，所以乜都講晒畀林二汶聽，我收到歌詞嗰日，感動到喊咗出嚟，佢真係連好細微嘅嘢都寫到出嚟。呢排我忙於練歌，遲啲喺婚禮上播，每次唱我都好感動，因為我真係好愛阿澤，我哋十六歲就識，隔咗幾年先正式拍拖，中間經歷咗好多嘢，我真係好愛阿澤。」杜汶澤則透露今次派帖打破傳統，不送禮餅送薄餅禮券，不少朋友都表示禮券很漂亮，並打算留作紀念。
