上個禮拜英超西布朗護級成功後，球迷蜂擁衝入球場嘅浩翰場面歷歷在目，但同樣情景唔可能喺嚟緊禮拜意甲煞科日出現。意大利聯賽會宣布，如果煞科日任何比賽完場後有球迷衝入場，嗰隊波都會被判輸○比三；即係話球迷太激動落場慶祝嘅話，隊波分分鐘由護級成功變失敗。呢條例好明顯矯枉過正嘞。
「卧底」球迷搞破壞？
意大利不嬲有球迷煞科日衝落場嘅傳統，邊隊最後一日落實奪標或者護級到，球迷都會衝落場搶球員波衫波褲波襪，呢種激情行為連球會同球員都默許。意聯賽會家吓以保安為理由扼殺呢個傳統，球迷捧場成季最後想開吓P都唔得，認真不近人情。再講，隨時有「卧底球迷」玩嘢，保安一定要加強，講到尾都係有關方面自己捉蟲。唉，意大利波，搞邊科呀？
連中三元夠晒威
科倫爭伊圖2粒咋
前晚維拉利爾射手科倫對巴塞連中三元，雖則話對方放軟手腳，但喺魯營入三球就真唔簡單，家吓佢響西甲射手榜只係落後伊圖兩球。佢今季咁堅，唔知成日入唔到波嘅曼聯有無後悔棄用佢？講時講，伊圖呢場波射失十二碼，又近門失機，如果最後俾科倫趕上就自己攞嚟。
連輸3場失兩錦標
士砵亭黑開有條路
士砵亭個幾禮拜前重有機會當雙冠王，勢估唔到最近連輸三場，繼足協盃決賽主場輸波後，前日聯賽輸畀國民隊後連聯賽都無埋，賓菲加封王。所以話，要兼顧聯賽同歐洲賽真係唔易。士砵亭足協盃對手莫斯科中央陸軍就唔同，乘勇返聯賽反勝死敵莫斯科斯巴達三比一，贏開有條路。
涉打假波兼迫走教練
李瑋峰落選國足隊？
深圳健力寶內亂事件引起關注，就連即將公布嘅國足集訓名單都受到影響；因為涉嫌打假波同迫走教練遲尚斌而被球迷視為「球霸」嘅隊長李瑋峰，可能因此落選，中國足協對事件非常關注，若然調查「球霸」事件屬實，李瑋峰有機會暫時被取消國足成員資格。
墨西哥財團接手
桑坦德精兵隨時殺到
西甲聯球隊桑坦德即將會由一間墨西哥投資集團接手，據講呢間財團將會搵幾個喺墨國班霸球隊藍十字軍搵食嘅好手過去桑坦德，包括阿根廷國腳級人馬施薩迪加度、S干沙利斯及羅馬諾利等；我求大俠知道呢幾位球員係有啲料到，如果成事，西甲聯隨時又多股新勢力同列強抗衡。