呢個星期六就三十七歲生日嘅澳洲女歌手KylieMinogue，喺上星期五早上八點，已經接受咗切除乳房腫瘤手術，而前日佢嘅主診醫生亦已經向外公布，表示呢個手術相當成功，Kylie胸部一個好似高爾夫球咁大嘅腫瘤已經順利切除，而且癌細胞並冇擴散到其他部位。
患難見真情
Kylie完成手術後，已經返番去佢父母喺墨爾本嘅屋企休養，而佢出院嘅時候，有傳媒就首次見到出事後嘅Kylie，當時佢坐喺車入面，戴住太陽眼鏡，而男友奧利華馬天尼斯（OlivierMartinez）就坐喺旁邊，搭住女友膊頭，Kylie就緊緊咁捉住奧利華嘅手，今次佢兩個都可算患難見真情，有報道重話奧利華會等Kylie好番後同佢結婚。
由於Kylie啱啱做完手術，預計呢個星期會好好咁休養，之後就要投入另一個療程，嚟緊嘅四個星期，Kylie會每日喺PeterMacCallum癌症中心接受放射治療，據知呢間癌症中心係全球治癒癌症成功率最高嘅地方，有七成病人都能夠醫好，而且佢亦會服食一隻每年花費二十八萬港元嘅新藥，所以相信Kylie康復嘅機會都幾樂觀。
沖涼時發現
另外，Kylie個細佬Brendan透露，原來上星期Kylie係喺沖涼嘅時候，發現自己胸部出現腫塊，Brendan話：「佢沖涼嗰陣發現腫瘤，我肯定以後有數以百萬計嘅女仔會喺沖涼時嘥多少少時間。」