中央欽定港英餘孽煲呔做新的特首，好多土共思想上都冇法搞得通，八方問自認開明左派嘅「飛天朱」點解親中陣營培養唔到人才，朱幼麟好直截了當話，咪因為「愛國愛港」冇客觀標準，結果出唔到叻人囉。
「飛天朱」舉例話，好似商界，可以用金錢多少嚟定邊個成功啲；而政界就以選票，但係「愛國愛港」，點定邊個愛國愛港多啲，邊個少啲？於是咪愈搞愈冇計，吸引唔到精英加入。
咁又係，唔通日日叫「胡錦濤主席萬歲」就愛國啲，日日話「煲呔好嘢」就愛香港，呢個真係好難定高低，連飛天朱都咁講，左派陣營真係要認真檢討。
唉！其實香港人好少唔愛國嘅，香港係我哋嘅家，又點會唔愛呀？本是同根生，相煎何太急！
傳真︰2623-9278
電郵︰[email protected]