碧咸喺前晚皇馬對馬體會場波，「掃」低哥沙攞到第五面黃牌，下周聯賽「煞科日」對薩拉戈薩要停賽，提早收咧！事後世界各大傳媒出晒類似標題「碧咸停賽，英格蘭得益！」，事關英格蘭國家隊月底會去美國打熱身賽，𠵱家已經唔使打聯賽嘅碧咸就好大機會打晒兩場熱身賽喇！（原本只會上陣打哥倫比亞）
攞牌博停賽有前科
碧咸即刻反駁呢的陰謀論，重話自己永遠都唔會故意攞黃牌！講大話呢樣嘢，我求大俠最唔能夠接受；今季季初，英格蘭響世盃外圍賽對威爾斯，碧咸因為有傷，肯定下場要缺陣，於是刻意犯規攞牌停賽，呢件事佢賽後自己都承認㗎！
既然有「前科」，又好難怪傳媒咁樣猜測嘅，但我求大俠都好理解佢嘅心情。事關最後一場聯賽已無關痛癢，但係呢次國家隊美國之旅對佢就好緊要喇！因為○四歐國盃後，佢喺國家隊嘅地位大不如前，家陣車仔雙雄泰利同林柏特如日方中，呢次如果唔跟埋去鞏固隊長地位，容乜易好似蘇甘保咁失寵㗎！
叮走副會長先肯續約列卡特唔識以和為貴
列卡特夏天就要同巴塞傾續約，原來佢同會長拉樸達一樣好唔妥副會長羅素，皆因對方一直認為應該由史高拉利執教巴塞。於是，列卡特就同會長拉樸達講，要佢留低都得，但係要請羅素走。我求大俠就勸列卡特以和為貴喇！鬼叫迪高同朗拿甸奴都係羅素嫡系咩！
宿醉未醒去練波摩亞被炒攞嚟衰
正所謂酒能亂性，近日有兩名球員因飲酒誤事。慕遜加柏個澳洲國腳摩亞周日被球會解除合約，原來佢上周四飲到「啤啤夫」去訓練，激到體育總監彭達紮紮跳，最後被炒魷。而愛華頓嘅比亞堤周日亦被發現飲醉酒兼帶一個女士入酒店，聽講佢已經有未婚妻，睇吓佢今次點箍煲！
射入靚波捧希臘盃李華度鹹魚翻生
唔少名宿，包括球王比利都睇好李華度重可以響出年世界盃佔一席位，我求大俠初初聽以為係客套話，但李華度前日喺希臘盃決賽省入球靚波，助奧林比亞高斯贏沙朗尼卡三比○捧盃，一搔六年之癢；隊波家陣隨時贏埋聯賽成雙料冠軍，睇佢咁勇，邊個敢話佢出年世盃無機會？
溜馬上下盛意拳拳米拿玩多季啦喂！
NBA溜馬隊老將米拿隨住球隊早前喺季後賽出局而正式退休，但溜馬總裁華殊早兩日表示，佢有意畀米拿六百一十萬美元玩多季，因為佢認為米拿可能會對籃球眷戀。雖然米拿接近四張，但佢今季常規賽末段同季後賽嘅表現，真係重有料到，比好多喺聯盟呃飯食嘅球員好。
逢周一至周五見報