上周五美股收市變化唔大，對港股冇乜指導作用。港股搵唔到利好因素，上唔到去邊。不過交投淡靜，有心人要做嘢，唔使太多彈藥，個市如果跌落去，又有挾淡友可能，所以暫時都係反覆上落。
滙控C輪：滙控（005）窄幅波動，上周五高低價位原來只係相差1格，唔係124元，就係123.5元。蝸步行動嘅股份，相關窩輪最好咪搞住。溢價有番咁上下而壽命又有限嘅C輪，搞唔過。過多兩三個禮拜，回頭一望，滙控如果冇郁到，呢啲C輪溢價只係微微一縮，輪價就已經蝕到揸家呱呱叫。
買滙控C輪唔想蝕溢價，要揀啲壽命長嘅，例如4766、3821等。4766年底到期，輪價56仙，溢價2.9%，槓桿率22.1倍（有效13倍），引伸波幅12%。
滙控P輪：如果睇好滙控，當然買C輪，睇淡則當然買P輪，不過都好難落手，成交太少，成交最多嘅4785，金額唔夠3球，10月到期，溢價3.7%唔得吸引。勉勉強強可以諗嘅係4691，7月中夠鐘，輪價46仙，溢價0.5%，槓桿率27倍（有效18.8倍），引伸波幅12.5%。隻輪成交金額得幾十萬，做得大，難以轉身。
章盛