早排曾經有輿論批評，話唔知幾時上到市嘅領匯，冇為旗下商場動腦筋振興人流。
話口未完，噚日領匯同香港文化博物館合辦嘅「世外桃源─徽州民居建築圖片巡迴展」正式揭幕，首站正正係租戶投訴多多嘅黃大仙龍翔中心，真唔知係領匯搞活動前宣傳不足，定係商場租戶眼見生意淡泊心煩意亂，唔知就嚟有展覽搞？
今次展覽，由噚日起至下個月十二號，依次序喺龍翔中心、天水圍頌富中心同埋樂富中心舉行，每處一個星期。
內容係將享富盛名嘅徽州民居建築雕刻，介紹畀香港人欣賞，利用各式圖片，展示徽州風光同村居情懷。另外，重會有「齊來砌徽州屋仔」，同埋「門罩裝飾設計」遊戲，啱晒大人同細路一齊玩。
如果市民有興趣了解多啲，可以去香港文化博物館，睇更詳細嘅有關展覽。
信和記招玩神秘
新盤宣傳花招百出，不過搞得多，其實已經好難再有新意。今日信和都搞記者會，就玩「神秘」，故弄玄虛，淨係通知大家，下晝喺中環皇后碼頭集合，但係記者會搞乜嘢，做乜嘢宣傳，全部唔透露，想畀啲神秘感同新鮮感大家。
不過，去得皇后碼頭，照睇都係上船嘅機會多啲，實際上咩葫蘆賣咩藥，希望唔好令人失望而回啦。
宇晴作價等起飛
新盤嘅「天價」成交，近排成為具爭議性話題，發展商當然希望啲特色單位，可以藉住市場有高價成交嘅消息，愈賣愈貴，不過，事實未必咁理想。
長沙灣宇晴軒第六座海翡翠，三房同相連戶𠵱家都接受預留，中原分行經理許永生話，其中一個高層G、H相連，一千三百幾方呎嘅單位，就以九百二十二萬成交，呎價六千九百幾蚊。
價錢雖然唔錯，不過蘭西記得，海翡翠開賣之前，發展商話，相連要賣七、八千蚊呎，𠵱家似乎重差一大截，複式更加話要過萬蚊一呎。唔知呢啲「天價」成交，重有冇機會出現呢？
美記行內挖舊人
地產代理行業最講究自然係經紀質素，一個戰鬥力強嘅經紀，唔單止旺淡市都搵到食，亦係幫公司維持業績嘅重要資源。
美記自然深明此道，除咗更積極培訓新人，上個月起，廣發英雄帖，邀請一批舊同事回巢，名單包括已轉行同埋喺第二間行做緊嘅舊部。
地產代理行頭窄，轉嚟轉去都係嗰幾間，行內經常會有轉投陣營嘅事。美記咁高調嘅行內挖角行動，聽講已經有七十人響應，包括主管級，其中新任嘅工商舖租務部主管吳先生，○二年由經紀轉投製造業，最終都係返轉頭。
電郵地址：[email protected]