偷得幾日閒，唔走有排冇得走，要快快趣趣決定出埠地點，速戰速決。最唔使諗梗係又係泰國，平靚正，之但係得我一支公，在泰國得到個「唞」但又得唔到個「玩」，好似物唔係太盡到其用。近近哋台灣啦，但係又好似得到個「玩」又得唔到個「唞」，諗諗吓突然醒起新加坡，友人聽到後怪叫一聲：「唔係啩?!新加坡咁悶！」唔悶，唔悶，因為有老友。
首先在購物中心的OrchardRoad找間較像樣的酒店下榻，早上起來先吃個早餐，在泳池享受一會通宵驟雨後的新鮮陽光。午間，一路齋睇唔買地行到HMV對面的CathayCineleisure，該地庫有一個很地道的FoodCourt，有好嘢食又有冷氣，唔會一身汗。海南雞飯、肉骨茶、炒貴刁、豬雜湯、鴨撈麵、新鮮果汁全部齊，通通有水準，一定唔係最好，但係已經好好，兼且又方便又經濟。
首推那裏的「喇沙」，在香港吃到的普遍都是離譜「喇沙」，湯底稀得像水，既不香又不辣，米粉入口冇味，配料也「遷猜」（求其）得很。CathayCineleisureFoodCourt的「喇沙」，湯濃得像椰漿，顏色是咖喱黃，但只香不辣，辣味來自浮在米粉上面的辣膏，記緊要加，否則別吃「喇沙」。豆腐卜、雞蛋及最最最重要的鮮蛤（螄蚶），在如此濃味中，只有鮮味掛帥的鮮蛤才能突破味覺的重圍，由於灼得剛剛好，肥厚的鮮蛤脹嘟嘟的，入口一咬，「波」的一聲鮮汁四溢，湯濃、蛤鮮、草料香，每口都濃鮮香，連續三日，每日都吃，才坡幣「三溝半」（港幣十八元左右）一碗，食唔厭。