成龍自從批評台灣總統大選係一場笑話之後，掀起連番風波。日前佢喺康城又話四年內唔去台灣，而台灣新聞局局長姚文智就話唔歡迎成龍出席康城舉行嘅台灣之夜，不過冇話唔畀佢去台灣。
接電話時在機上
點知噚日有消息話台灣新聞局局長姚文智喺二十號接到一通國際電話，對方重話：「我是香港成龍，聽說你不要讓我來台灣。」當時因為姚局長開緊記者會，所以叫佢稍後再打嚟，但之後就未有再接到電話，姚局長透過幕僚話，如果嗰個真係成龍，願意同佢好好傾吓。
不過噚日JCGroup嘅李慧良話，姚局長接電話嗰陣，成龍應該喺飛機上，而且成龍亦冇姚局長嘅電話號碼，所以電話應該唔係成龍打嘅。不過JCGroup方面話願意促成成龍同姚文智嘅對話，李慧良話成龍話四年唔去台灣，係因為睇見有關台灣機場嘅新聞，加上去年又有人為成龍上街抗議，佢驚會造成衝突，所以先唔去住喎。
孫燕姿叠汽水罐贏晒
孫燕姿噚日喺台北出席第三屆路跑競賽，燕姿第一次擔任起跑鳴槍嘉賓，佢話自己唔擅長跑步，但好鍾意攀石同游水，點知佢鳴槍時重做出伸脷掩耳嘅動作，認真搞笑。燕姿重同現場市民玩汽水罐層層叠，佢一口氣叠起十二個罐，贏晒其他參賽者。
元秋當元華係老公
元秋早前同周星馳到康城宣傳《功夫》，日前佢喺中環接受訪問時話近日忙緊宣傳電影《雀聖》。對於再度同元華合作，佢就話兩個人愈來愈有默契，其中重有一場佢同華哥嘅床上戲，元秋話：「我有着lowcut，鏡頭遷就啫，我哋大家放開懷抱去拍，我當佢係老公，佢當我係老婆！」
千嬅咀吳彥祖冇尷尬
楊千嬅同吳彥祖前晚喺尖沙嘴鬧市拍《千杯不醉》，劇情講千嬅同吳彥祖拍拖睇婚紗，有好多人圍住睇拍戲，有啲女仔見到吳彥祖重咿嘩鬼叫，猛讚佢好靚仔，又有班fans圍住千嬅攞簽名。千嬅同吳彥祖已經拍咗場kiss戲，千嬅笑話拍完《餃子》之後，覺得拍咀戲好小事，完全冇尷尬。
喻可欣情史搬上銀幕
早前喻可欣寫咗本《情海星空─我與劉德華》細述佢同劉德華嘅戀情後，近日有報道話喺內地素有「炒作大王」之稱嘅鄧建國對呢件事好有興趣，決定將本書改編成電影，重已經約咗喻可欣到廣州進行商談，唔知套戲會唔會搵埋參加《一舉成名》嘅「山西劉德華」扮華仔呢？
