自由黨司庫兼立法會議員梁劉柔芬（圖），喺上星期四突然遠赴美國，惹起唔少猜測。據講話梁太因為個肺出咗問題，所以急急腳飛去美國，做個更加詳細嘅檢查。
八方走去問吓梁太班黨友兼老友記，個個猛話梁太好健康，唔多察覺佢有病喎。好似喺立法會坐喺梁太隔籬嘅方剛就話，做咗咁耐「鄰居」，都唔覺梁太有事，對於梁太患病嘅消息都好詫異。同梁太都係friend底嘅張宇人，就話梁太喺美國有啲生意，每年五至六月期間都會飛過去睇吓，所以飛咗去都唔太出奇。
梁太嘅助理就好口密，除咗證實佢老細唔喺香港之外，其他乜都話唔知。就連問佢梁太幾時返，都係答唔知，好似有啲難言之隱咁，令到呢件事更加蹺蹊。
傳真︰2623-9278
電郵︰[email protected]