講到鬼片，喺筆者心目中一直都係西片嘅天下；港產片除咗70、80年代洪金寶嘅《鬼打鬼》、《人嚇人》及《人嚇鬼》系列，同香港史上最強鬼片《凶榜》之外，都好難講得上有邊套經典！如果硬要數，都係呢幾年崛起嘅彭氏兄弟《見鬼》系列，唔玩大卡士、最緊要嗒落有鬼味；本周最新返《見鬼10》，驚嚇加爆笑，好香港「土產」風味，論恐怖程度，都屬晚黑唔敢一個人睇嗰隻，$75抵玩價，值得捧場！
記者：朱崇德
《見鬼10》好多鬼古取材，都係香港鬼故事經典。
筆者其實最鍾意就係睇鬼片，重要係半夜三更人人瞓晒先睇嗰隻；近年令人印象深的鬼片，隨口噏得出者，都只有《七月十四》、《夜半一點鐘》、《恐怖熱線之大頭怪嬰》同《7號差館》等，數落只有感到年代久遠，原來近年港產鬼片都幾貧乏吓；難怪《見鬼》系列可以憑藉「硬橋硬馬」真撞鬼，殺出一條血路！
冇得退局玩見鬼10法
《見鬼10》故事背景發生在泰國，話說得仔（陳柏霖）與May（楊淇）兩姊弟、April（梁洛施）和高輝（古宇）一對情侶，在泰國朋友長貴的帶領下，根據一本《見鬼10法》的古書玩撞鬼；起初大家只係抱住一個玩玩吓心態，以為邊有咁易撞到吖！點知愈見愈清楚、猛鬼一隻比一隻惡！更難纏者，是呢個「見鬼遊戲」，有如《逃出魔幻紀》一樣，唔玩齊咁多款花式，都冇得收科！喺冇得退、局住玩下，一行4人終於出事，失蹤、發瘋、更甚者是要賠上性命！
《見鬼10》同頭兩集感覺最不同處，是由以往「鬼玩人」嘅主線，筆鋒一轉成為以「人撩鬼」，所謂先撩者賤，到後當然係「玩死」無怨啦！雖然手法上有所不同，但嗰種因果循環嘅警世思想，同敬鬼神而遠之嘅心態，亦是同頭兩集電影一脈相承。
笑住嚇超貼身驚嚇
所謂見鬼10法，其實是搜羅自世界各地的見鬼方法傳聞而成。當中包括盲人開眼、孕婦自殺、杯仙、十字路鬼、捉鬼迷藏、塗屍泥、室內開傘、倒頭栽、零時零分梳頭及活人穿壽衣；如果熟眼同系列電影，或者都會知道頭兩式其實是指《見鬼1、2》，餘下的8式就喺今集一次玩齊，論掟橋頻密程度，今集是同系列之冠！
今集《見鬼10》好多人都大讚佢對鬼嘅造型，感覺又實在又恐怖，第一幕高僧對鬼上身少女，雖然橋段較陳舊，不過好多人都一樣俾佢嚇得半死；鬼片最成功要素──套入現實生活，工夫都算做得幾足，好似巴士、半夜行人隧道、惡鬼跟人返屋企，都幾有切身恐怖感覺。不過當中有兩幕印象較深刻，一是屋邨街童常玩的「捉鬼迷藏」，真係唔知原來係咁玩，同有咁意想以外嘅效果！另一幕是「十字路鬼」，絕對係首選超爆笑位，同當年洪金寶扮紙紮公仔，真係有異曲同工之妙，必睇！
必睇Bonus幕後人鬼話連篇
預告片、故事大綱呢類大路嘢，真係唔講得上甚麼Bonus！唯一可睇是Makingof一段，有導演彭順、彭發、陳可辛及鄭丹瑞等專訪，講嘅大多係拍片心得、電影扭橋解話，都算對電影有進一步了解，留心睇是佢哋幾個「講鬼」嗰Part，爆笑又嚇鬼，娛樂成份唔會比電影遜色。
店舖查詢：DVDPro
電話：23326326
地址：旺角奶路臣街6E德發商場地庫B4舖
