李嘉誠捐十億畀港大，港大為表謝意，將醫學院用李嘉誠命名，點知立法會郭家麒醫生吹雞反對，本來一單慈善事業，搞出咁多是非。
點樣落台呢咁？若然郭家麒等醫生條氣唔順，可以私下向徐立之詐型，公布之前，諮詢解決，但公布咗，又嗌唔得，即是一家新郎，公布咗婚訊，全村人知道晒，突然對家新娘話唔嫁，咁你話情何以堪？
港大又話想私有化，想啲有錢佬捐多啲錢，政府就可以日後畀少啲！李生一彈就十億，支持醫學及科技研究，點知就搞出命名風波，令到捐錢嘅善長落唔到台，港大以後想搵鬼捐錢都得嘞！
捐錢畀大學，又唔准人哋命名？呢啲都算係書生頭巾氣作風！當年邵逸夫爵士捐錢畀中大，起逸夫書院，中大學生話：邵氏拍戲，拳頭枕頭，色情暴力，有乜理由畀邵逸夫爵士掛名呀？
逸夫書院都要改名？
冇錯，邵逸夫係重用過呂奇，導演過《丹麥嬌娃》等豔情片，不過人哋亦重用過知識分子大導演李翰祥，拍過清末歷史宮廷巨製《瀛台泣血》、《傾國傾城》、重榮獲英女皇封爵，好失禮呀？逸夫書院，堅持命名，用到今日，又有邊個嘈？
李嘉誠雖然冇拍過鹹片，不過佢老人家好多嘢都容易引起爭論。喺中國式小農社會，尤其現時呢個敏感時候，商人內鬥激烈，你捐得多咩，佢唔會同你鬥捐得多，但喺背後就有好多說話講。
咁都有得嘈，證明喺特區，想講「和諧」，係幾咁困難！捐錢冇和諧，唔捐錢又有罪，嗰十億元，捐又面目無光，之不過，又冇得同班醫生咁搞，縮番轉頭喎又！
咁點呢？不如咁，港大醫學院可以用番原名，不過就冇特權，公道啲，由逸夫書院開始，大中小學，甚麼蒙民偉樓、林百欣紀念中學、利希慎樓、周奕希樓，全部嚴打橫掃，所有以前捐錢嘅有錢佬，通通搣柴！
傳真︰2623-9278
電郵︰[email protected]