近期受到歐盟同埋美國先後作出措施限制大陸紡織品入口，令到本地紡織股股價弱過藥煲，但正所謂危中有機，雖然投資氣氛差，但難保家陣正係紡織股撈底最佳時機。
名牌紡織股福田實業(420)，上周公布截至今年2月的中期業績，盈利勁跌60.2％。各大證券行睇法迥異，有人繼續唱淡，有人就話負面消息已經全面反映，最差時間已過。
經紀黃話，單睇揸重福田貨源嗰幾個大芬，至今依然長情，就知佢哋有信心，加上股價累積跌幅已相當大，家陣開始分階段買入亦未嘗不可。
福田中期營業額比去年同期微升6.3%至31億元，但盈利就勁跌60.2%至5386萬元。福田盈利跌，原因係去年買入的棉花成本價格高昂，令成本急升，侵蝕盈利，但棉花價格已回落多時，未來成本應該會下降，有利改善盈利。
過去1個月，福田受到多樣負面消息影響，股價由4.80元跌落嚟，最低見過3.70元，上周五大升5%，收4.10元，成交股數467萬股，金額1883萬元。
慕容小初