上星期六講及基督教團體「反性傾向歧視條例」立法，DJL睇完，對左丁山講：「呢勻有好戲睇咯，一啲基督教團體財雄勢大，組織力強到極，視本身為香港道德保護神，既反賭波，又反賽馬改制，更反同性戀合法化，夠晒惡，民政事務局局長何志平一定俾佢哋煩到冇命，不知如何是好。不過咁噃，呢排基督道德派會遇上對手，喺傳媒佔唔到便宜，尤其是電台㖭，一定有人反擊。」
問DJL：「點解特別會係電台呢？」DJL笑笑口話：「電台呢行，最多男女同志。民政事務局重未寫性傾向歧視條例，已經俾基督教團體嘈死，啲同志倒會覺得，如果佢哋唔出嚟撐政府，分分鐘『同性戀』合法化會化為泡影，影響到佢哋權利嘅喎，唔反擊點得呀。」咦，俾DJL提醒咗，電台啲男女同志都係好有創意、有天份，有資格講嘢之輩，基督團體要燒佢哋眼眉，佢哋嚟一次絕地反擊，好合邏輯啫。根據美國、歐洲經驗，如果同性戀團體夠膽公開站出來，站起來，搞一次幾千人嘅遊行（外國稱為GayParade），一定會造成哄動性新聞，CNN、BBC爭住影，然後就會得到歐美同志團體聲援，引用國際人權條約大戰基督徒嘅聖經，精采咯。話唔定何局長受到GayParade嘅鼓勵，大膽啲去推動「性傾向歧視條例」呢。
DJL話電台節目主持人Ｓ與男伴已經在加拿大正式結咗婚，返嚟香港尋求法律承認，兩位男士正尋求司法覆核，如果贏到官司，會對特區政府及香港社會構成劃時代影響，好多法例都要修改。DJL話一般同志都想保持低調，唔想太揚，故此佢哋面對基督教道德重整派嘅進逼，可能唔敢出聲㖭