近年唔少長和系分拆出嚟嘅公司都令投資者損手，超人神話一再破滅，雖然李嘉誠喺上星期長和系股東周年大會度話，三十三年前長實以三蚊上市，至今連埋股息回報達一千倍，對股東絕對問心無愧咁話。不過股民係好現實嘅，對超人嘅千倍回報論似乎唔係好受落。
咁啱喺今年度嘅股東會上，包括李嘉誠、小超人李澤鉅等九名董事要輪流告退，要股東投票首肯先至可以連任。結果反對李超人連任嘅票數，竟然係九個重選董事之冠，雖然贊成佢連任嘅票數都唔少，但竟然唔及舊臣周年茂，真係冇面。舊年李超人喺和黃股東大會亦重選董事，嗰次雖然都有人反對，但當時係四名重選董事之中反對票最少嗰位，少過小電王米高嘉道理。
至於小超人都唔係咁受股東歡迎，佢喺長實同和黃嘅股東會都要重選，結果兩間公司嘅反對票都唔少，好彩有和黃大班霍建寧墊底，霍大班嘅反對票多過小超人三十三萬張，唔知算唔算護主有功呢？
傳真︰2623-9278
電郵︰[email protected]