今日對版之圍港熱話b
剛剛上畫的《星戰III》，可能係因為連接整個星戰故事的最重要一段，連帶全部六集星戰的產品都被狂掃。呢兩日巡過星戰迷必往入貨的玩具舖，發現1比1光劍更被掃至斷市！我哋即刻搵嚟幾個星戰專家兼賣家，即Check近期最熱賣貨種。Maythetoysbewithyou！
記者：馬慶武 攝影：何家亮
教你炒
就算斷咗貨，激光劍一樣勁多人訂，係近期最Hit貨色！訂劍6月中有貨（訂購價：$900-$1,000）！Luke版好似話唔會再返，見到有人賣、價錢啱，貴少少都唔好忍喇！
教你炒
好多Figure都值得買，不過要睇角色買，過多三五七年絕咗版，一定炒硬！好多二手貨都係愈賣愈貴。
教你炒
除咗玩具，書籍都值得收藏，因為剛出嗰段時間無缺貨，售價唔貴，但過三兩年就好難搵到，自然有價有市。
斷貨光劍 日吸過百問價
舞得劈得又識得發光發聲，戲中正邪忠奸個個都手揸一把，1比1激光劍熱賣、斷貨、再入、再斷絕對係意料中事！Mendy'sShop老闆Mendy就話因為有個客訂咗未攞貨，擺咗個盒喺度，每日吸引過百大人細路問價！而Toyzone老闆Simon重話啲客聽到光劍斷貨，落訂都要6月先有，失望之餘連上一代的舊貨都唔放過，原價$900炒到$1,200都只賣剩兩把。真係趕住要把光劍變身黑武士的Fans，動作就要快喇！
大細新舊都照搶
借機翻身 舊貨全面清倉
《星戰III》接落去就係70年代的《星戰IV》劇情，可能因為呢個原因，令到頭兩集前傳同埋舊三部曲的產品都借機大翻身，無論倉底貨、二手貨都大把人搵。
Kubrick五倍炒價無手軟
今期舊版Figure最當炒，甚至炒價以上再翻炒，不過炒價產品其實冇咩重心，其中貨少矜貴就一定好炒。Toyzone老闆Simon話：「貨量少、難搵的就一定有炒價㗎喇，好似呢個Kubrick，有客叫我哋喺網上面幫佢投返嚟，原價6,000日圓，𠵱家計埋運費都要二千幾港幣，佢都一樣無手軟，總之市面愈難買到就愈當炒！」另外Clark's老闆Jerome就話，想知歷年當炒Items，就最好買一本炒貨圖鑑，睇定啲行情再度定入咩貨。
Yoda大師無喇喇搶斷
講到最受Fans鍾愛的角色，就出人意表喇！唔係黑武士、都唔係Obi-Wan，而係Yoda大師。「真係解釋唔到，不過最多人嚟搵的真係Yoda啲產品，Lego、Figure一早已經賣晒。Fans冇得講，連一啲冇買開星戰玩具的女仔客都嚟搵Yoda大師的蹤影，好厲害！」不過Simon話Yoda好多產品都已清晒貨，𠵱家想買就惟有買炒價的舊Figure喇！
Fans熱話：大陸朋友叫幫手
售賣點：
a/Toyzone（銅鑼灣糖街3號銅鑼灣商業大廈1601室/28826850）
b/Mendy'sShop（旺角皆旺商業中心地庫B19號舖/31885323）
c/Clark'sComics&Novelties（銅鑼灣糖街15-23號銅鑼灣中心商場202、205、207舖/28907718）
