數碼通與贊助曼聯球衣嘅電訊公司Vodafone聯合推出３Ｇ手機，大賣廣告，用好多曼聯球星做廣告人物，令人矚目。譬如中環地鐵站近歷山大廈入口，就有一幅巨型廣告圖，內裏曼聯球星形象十分突出，廣告圖有英文Wewin。
小公關嘉芙睇完幅廣告，問左丁山：「Wewin，好似唔多似係一般口語。學校先生教落，比賽完畢，我哋先知道邊個贏，如果我哋贏咗，已經係比賽之後，所以一定講Wewon。比賽之前，我哋有信心取勝嘅話，就會話Weshallwin或者更大決心一啲，講Wewillwin，簡寫就係We'llwin。如果係五五波，教練鼓勵士氣，就會同我哋講Wecanwinthismatch。好似從來冇講Wewin呢個現在式嘅噃。」
嘉芙離開學校冇耐，重有啲求知好奇心，睇完廣告，居然識得質疑。廣告既以曼聯球員為主角，我哋當然聯想到曼聯嘅足球賽，雲尼斯達萊、施維斯達等人攬埋一嚿慶祝，自不然係講Wewon，點會講WeWin吖。嘉芙話想有機會問吓古德明老師關於「WeWin」是否用得啱，好啦，左丁山認為唔妥，如古德明老師有時間裁決，以佢之言為準。
執啲廣告字眼，要非常小心，愈係簡單淺白，愈容易出差錯，出街前要畀多幾個人審閱先至得。英文唔係我哋嘅母語，更應小心。用我哋母語又點呀？照錯可也，唔認真就會搞錯晒，將「不知所終」誤為「不知所踪」、「撤銷」誤為「撤消」，「渾身解數」唔係「混身解數」、「挾持」唔係「脅持」、「不省人事」唔係「不醒人事」……如果唔識，咁就開卷有益，買本容若先生嘅《常誤詞語辨正》睇吓，包你唔會將「背景」寫為「背境」、「內疚」寫成「內咎」！