今年嚟E3，一心見識吓三部新主機嘅瘋狂攻勢，點知Revolution唔見影、PS3又無得試，得部XBOX360撐場。掃興之餘，又發現今年E3另一個特色，就係好多人入場都手持一部PSP或NDS，真係差啲以為要憑機入場！無他嘅，喺E3經常要排長龍，乾等時打吓機、同人對戰的確無咁悶。最好橋係任天堂，搞咗個NDS遊戲下載站，費用全免又有新Games玩，卒之成功吸引大量機迷爭相入場！
記者、攝影：許福合
今年手提機大熱，SCE同任天堂自然力谷，所以場館設計都各自用咗唔少地方來俾機迷試玩、交流一下心得！
SCE同任天堂今年做咗隔籬鄰舍，似乎有啲競爭意味，事關PSP同NDS鬥得正熱，大家都不約而同將手提機部份設計成最接近對方嘅一邊，可以話係「兩岸對峙」，形成一個手提機區域。論人氣度，應以任天堂這邊比較優勝，除咗近排隻《任天狗》帶旺咗NDS外，任天堂更預備咗好多有獎遊戲供機迷試玩，唔似得SCE只得試玩「咁悶」。現場遊戲包括以NDS賽車、答問題、經Internet與網友比賽等。NDS機主更可走到下載站，即時無線下載任天堂今年E3遊戲Demo，如《Polarium》、《Meteos》等，最正係有埋《薩爾達》嘅預告片同畫集下載，所以現場圍咗過百人喺下載站！另一邊嘅《任天狗》專區亦有唔少人試玩，未玩過嘅自然爭住玩，現場亦有不少「狗主」即興換狗、換禮物，非常忙碌！
NDS新Games介紹
任天堂一向極重視歐美市場，故多款NDS新作都喺現場玩到，而且大多英文介面，即係先推出美版嘅機會極高！幸好NDS遊戲並無區碼限制，香港機迷都可玩到。
坐住靚椅打PSP
坐住靚椅打PSPSCE除咗PS3，重點自然係力推PSP，所以場館頂部就設計咗個特大闊屏幕，用以顯示SCE旗下遊戲，好搶眼。而場館大約用咗三分一同2樓來供機迷試玩，大大話話出動超過200部PSP，包你行埋去唔使排隊就去拎部PSP玩玩。想舒服一啲，SCE更特別設計咗一個透明圓形「特等座」，喺上面搖吓搖吓相當舒服過癮，玩PSP又有另一番風味！
PSP新Games介紹
《CODEDARMS》
一款全3D第一身射擊遊戲，能盡情發揮PSP處理3D能力，試玩時即使去到唔同場景，都無爆格或窒吓窒吓情況出現，流暢度唔錯，傳聞還可以「執」嘢，取得新武器。
《VirtuaTennis：WorldTour》
雖然世嘉就話此遊戲還在製作中，不過玩過就覺得完成度好高，並且好多遊戲模式都已經玩到，而控制到反應都相當唔錯，而畫面直頭可媲美之前嘅PS2版本！
同場加映
挑戰者Gizmondo年中推出
今年E3係遊戲機一年，行行吓都見到部新手提機，預計會於年中於美國推出，名為Gizmondo。論遊戲界背景同資源，當然唔及得上PSP同NDS，不過講到硬件機能，其實都唔可以睇小，如用上SamsungARM9400MHz處理器、nVIDIAGoForce3D4500繪圖晶片、64MB記憶體、內置SD卡槽等規格；講到呢度，係咪熟口熟面呢？其實Gizmondo係一部WinCE機種，不過主打遊戲同多媒體功能，亦由於使用WinCE平台，遊戲方面都有唔少可供選擇，而喺2.8吋TFT芒上玩，效果都唔錯。
影相打機乜都得
試玩時就發現Gizmondo內置感測功能，當遊戲機移向左面，遊戲會偵察出來，將畫面移向左。另一個特別之處，係內置一個640×480鏡頭，可利用鏡頭拍攝實物，加埋落個Game去玩，都算係好創新！除咗打機，Gizmondo重可能聽歌、睇MPEG4、影相，最勁支援三頻GSM、藍芽，方便連線對戰或收發E-Mail。怕迷路？Gizmondo更內置GPS接收系統，可隨時話你知處身位置，功能真係包羅萬有。
對應遊戲
《JonnyWhatever》
一個好激嘅動作遊戲，玩家要拎住死光槍射死屍，操控爽快之餘，畫面水準亦算不俗。
《JUMP》
遊戲內容同個名一樣，主要係樓與樓之間跳來跳去，顯示出因採用nVIDIA晶片關係，所以3D機能頗強，可追上新一代遊戲機。
E3花絮
