令本地《大長今》fans望穿秋水的「大長今」李英愛，終於在前日抱恙抵港，展開四日三夜的親善之旅。昨日她在灣仔君悅酒店舉行記者會，吸引逾百傳媒採訪，其間李英愛表示擇偶的唯一要求只是一個「愛」字，並寄語大家要有大長今精神，不要輕言放棄，只要努力就會成功。
李英愛昨午約十二時四十分在經理人李周烈及無綫總經理陳志雲陪同下，現身灣仔君悅酒店舉行的「大長今——李英愛謝謝您的愛親善之旅」記者會。束起秀髮、穿上粉紅色上衣及紅裙的李英愛，更見嬌俏動人，一身LV打扮的她，還襯上一個LV魔鬼魚加鱷魚皮手袋，行頭超過二十萬元。而在歷時一小時的記者會上，李英愛幾乎有問必答，又不時報以燦爛笑容，表現相當友善。
盤滿缽滿
御膳碟子送贈無綫
李英愛甫出場即以普通話說：「大家好，我係李英愛。」其後再以韓語向在場傳媒打招呼，她說：「多謝大家歡迎我，原本我喺韓國嚟香港時有啲身體不適，但休息咗一晚已經好番好多，希望今次來港可以帶畀觀眾同媒體開心嘅時間。」之後陳志雲便代表無綫致送水晶花樽給李英愛留念，而李英愛亦專誠從韓國帶來皇帝享用御膳時所用的碟子送給無綫，寓意盤滿缽滿，她又在現場一幅巨型《大》劇海報上簽名，並寫上英語ThankyousomuchformyH.K.fans.（多謝香港觀眾對我的支持）
以下為記者會對答內容。李：李英愛，記：記者
記：今次來港有何感受，除無綫外會否替其他機構工作？
李：我上一次嚟香港已經係○一年，當時為一套電影宣傳，今次感覺有更加多人認識我同愛錫我，心理負擔好重，知道自己要更加努力。
記：為何你會有「氧氣美女」的稱譽？點解你同韓國男星合作很少傳出緋聞，你又希望何時會遇上生命中的另一半？
李：二十歲時我讀大學二年級，當時幫韓國化妝品公司拍廣告，啲人就咁稱呼我。男演員方面我只係同池珍熙、裴勇俊等人合作過，冇緋聞傳出要問番佢哋。至於未來另一半，我冇諗過會係點樣，最緊要係一個「愛」字，只要係愛就冇其他要求。
釜山交流
盼與偉仔合作拍片
記：《大》劇演員先後參與香港製作，你可有興趣參與？
李：我曾經喺釜山電影節見過王家衞同梁朝偉，我都希望同佢哋合作。其實之前有同好多內地片商傾過，如果有適合劇本一定會有機會。
記：《大長今》劇中人物先後來港宣傳，點解你咁遲先嚟？
李：之前忙緊拍電影《親切的金子》，好辛苦，需要啲時間休息。
記：認為《大長今》喺香港及亞洲嘅成功因素？
李：初時我接拍套劇都有疑問，因為係古裝，好多古代嘅嘢，亦都有好多健康嘅美食，韓國人可能會接受，冇諗過東南亞區都有咁好反應，大長今亦令我學到好多做人道理，相信努力便會成功。
記：《大長今》中你本來同池珍熙有場接吻戲，點解會刪減咗？
李：因為係古裝戲，覺得唔應該有呢啲場面，經過導演各方面同意刪減咗，但可能傳媒太關心大長今，希望見到呢個場面，所以覺得好可惜，但我認為長今同皇帝嘅感情戲再長少少會更加好睇。
七月再臨
宣傳《親切的金子》
記：拍攝《大長今》時你曾經甲狀腺發病，現時身體狀況如何？早前你喺《大長今》拍攝特輯尾聲中，曾經喺鏡頭前講過：「辛苦大家，我知我成日發脾氣，我會改。」係咪拍得太辛苦所致？
李：我噚日嚟到香港有少少傷風感冒，拍劇時都有呢啲小問題，但見到套劇咁受歡迎，就乜嘢都唔記得晒。
記：接下來會否放一個長假休息充電？
李：呢段時間唔會充電，反而會爭取多啲時間同觀眾見面，有時間嘅話就想去絲綢之路行吓，而電影《親切的金子》七月會喺香港上映，屆時有機會再嚟香港宣傳。
記：《大長今》令到喺世界各地嘅韓國人感到驕傲，對海外韓國人有乜嘢說話想講？
李：喺外國嘅韓國僑胞都係愛國者，睇完《大長今》之後要學會自力更生，唔可以放棄，要有大長今精神，努力就會成功。
最後李英愛表示非常感謝北京、日本、韓國及香港等地的各界fans支持，並希望大家日後會多關注韓國電影及電視劇，多些了解韓國文化和愛錫韓國。
採訪：卓寶花、王崇穎
攝影：葉君海、陳慧安
