維奧生物（1164）04年下半年傷得好深（捧場客在內），唔跌唔大，05年見有好開始，昅昅無妨。
維奧02年2月創業板上市以嚟，靠自家鈣片「樂力」起家（佔收入及純利90%樓上），亦賣到順風順水。由於唔想承受單一產品風險，維奧上年下半年積極催谷其他藥品，結果，淨係第4季宣傳消售費狂扯上5400萬元（上半年亦不過4720萬元），上市以嚟首次錄得季度虧損，拖累04年度（12月止）純利跌近半，得番3300萬元，股價半年跌逾5成，相當慘烈。
最新情況又點？05年度首季度，維奧收入同純利到9240萬元及1580萬元，同樣逾兩成增長、維奧恢復派息（0.5仙）、銷售費調低到2900萬元，回復往年佔收入3成「正常」水位、鈣片樂力仍有organicgrowth（收入增21%），同時，應佔收入比重跌到83%，反映依靠單一產品風險正在紓緩。經一事長一智，數據回復正面，嚟緊星期四除息前，可以小注。
長汽跌近2.2元可一試
長城汽車（2333）啱啱創上市以嚟低位2.475元，14RSI跌到得番22，當技術性超賣冇到，又講兩點。第一，長汽手頭淨現金20.72億港元，現價2.5元，同每股淨現金2.2元已經差無幾。再講，汽車股當中，呈淨現金狀況有駿威（203，每股0.33元）、慶鈴（1133，每股0.44元）及吉利（175，但得150萬元，已發行41億股），長汽現金養份最充足。第二，今年以嚟，惠理基金積極吸納長汽，至今揸咗2105萬股（佔H股8%），出手價2.925元至3.2元不等，若然大孖沙喺呢段水位唔嫌貴，長汽現價更吸引，若跌近每股淨現金值，可以一試。
錢雋