由佐治魯卡斯（GeorgeLucas）執導嘅《星球大戰前傳III黑帝君臨》，繼周四凌晨開畫時創出美國嘅開畫凌晨票房紀錄後，連日來繼續報捷。據初步票房統計，《星戰前傳III》喺周四開畫當日，全美勁收五千萬美元（約三億九千萬港元），大破《蜘蛛俠2》同埋《史力加2》之前創下嘅票房紀錄。
《星戰前傳III》喺開畫前已經氣勢如虹，唔少人都睇好佢會開創新紀錄，不過冇人估到佢可以一日收成五千萬美元。據資料顯示，《星戰前傳III》唔止打破《蜘蛛俠2》喺上年創下嘅四千零四十萬美元（約三億二千萬港元）嘅最高開畫日票房紀錄，就連《史力加2》喺去年創下嘅四千四百八十萬美元（約三億五千萬港元）最高單日票房紀錄都畀佢破埋，真係犀利。
威震歐美
咁都未算威，《星戰前傳III》喺周四至周五於全球一百零四個國家上映，套片喺歐洲同南美洲各地都同樣咁勁，更分別創下德國、墨西哥同智利嘅單日最高午夜場票房紀錄。套片喺法國亦創下最高美國電影開畫紀錄同埋巴黎最高單日入場人次紀錄，喺英國創出最高電影預售紀錄、同埋喺比利時創下最高開畫日票房紀錄，睇嚟佐治魯卡斯同埋班演員今次都飲得杯落嘞。