蔡楓華近年行為都好怪異，佢失蹤咗一排，噚日突然拖住個手提行李篋，去咗跑馬地馬會總部行政大樓，蔡楓華喺嗰度胡言亂語擾攘咗接近五個鐘。馮仁昭見到當年人稱「白馬王子」嘅佢，變到瘋瘋癲癲，認真欷歔。
問佢去馬會做乜？蔡楓華就話：「馬會隨時成為國家嘅property（財產），我嚟係將佢收歸國有。近年我本來喺紅館有六場個唱，但都俾黑社會搞『禍』。搞台獨，冇好結果。」
蔡楓華重自稱前晚俾黑幫指嚇，佢話：「有三個黑社會拎住三支手槍指住我個頭，好彩我有二十四支AK47，不過我心情好，放佢哋一馬。其實我可以叫中共解放軍『開火』。」
自稱贏波二百萬
蔡楓華繼續語無倫次話：「我有無上權力，千祈唔好得罪中國共產黨，佢會追你去天涯海角，隨時會冇命。啲黐線佬、黐線婆唔好再黐線，我有十支M16，唔夠我嚟，今日我蔡楓華，唔同噚日，乜都唔驚。」
至於蔡楓華點解會喺馬會出現，有馬會職員話有人自稱贏咗二百萬波，所以嚟攞錢，實情當然係流啦。
陳豪攬經理人當閒事
陳豪早前被影到同無綫高層兼經理人呂淑秋（人稱Carri媽）街頭搭膊攬腰嘅親密照，噚日陳豪就呢件事接受商台電話訪問，佢重笑住否認話：「我哋不嬲都係咁，我當Carri媽係半個阿媽，嗰日係我生日之前，Carri媽送生日禮物畀我。」而已有丈夫及兩個女嘅呂淑秋就話：「唔係事實唔回應，如果你哋要炒作都唔好涉及到屋企人。」
謝霆鋒冇刻意避栢芝
謝霆鋒啱啱喺康城返港，噚日接受商台電話訪問，講到佢同前女友張栢芝（右二）喺康城一齊食飯呢件事，霆鋒話：「我冇張揚呢件事，我哋都有成組人食飯。」又講到兩人住喺同一間酒店，有報道指霆鋒表現得好避忌，佢就話：「坦白講我冇刻意去避，記者朋友影啲相返嚟，都係想滿足大家嘅好奇心，點寫都好啦，我都係去做嘢。」
王晶免做《星戰》炮灰
元華、黃泆潼同王晶前晚喺銅鑼灣一間酒吧宣傳《雀聖》，黃泆潼負責叫啲酒客甩牌，最厲害嗰位喺一分鐘內甩到二十幾隻，但王晶就只甩到一隻。王晶話套戲下個月三號上畫，好彩避過《星戰》喎，王晶話：「我一啲都唔鍾意星戰，但我哋套戲都冇得同星戰比啦，其實星戰係鬼佬如來神掌，outdate啦。」而《星球大戰前傳III黑帝君臨》前日首日上映收一百六十九萬，成績不俗。
樋口明日嘉肚腩ByeBye
樋口明日嘉噚日去到柴灣為纖體飲品「膳後瘦」拍攝平面廣告，樋口自從上年為一個豐胸產品擔任代言人後，身材豐滿不少，噚日佢亦穿上不同款式嘅比堅尼大騷身材。
樋口重笑住話為拍攝廣告，最近不斷跑步keepfit，前日重幾乎禁食，以免肚腩現形，在拍攝前，只吃小量早餐頂肚。完成廣告工作後，樋口將會拍攝新片《千杯不醉》，喺戲入面佢飾演一位名媛。
