行會成員查史美倫最近又有高職，佢舊年獲委為滙豐銀行非執行董事之後，噚日滙豐宣布，七月一日佢會兼任附屬公司滙豐投資亞洲控股嘅非執行主席。呢個位原本係滙控CIBM主管歐智華做，但佢調返英國，要搵人頂替。
除咗查太，滙豐銀行董事會亦有郁動，包玉剛女婿蘇海文退任非執行董事，佢原本兼任嘅非執行副主席職位，就由機管局主席馮國經細佬馮國綸出任。講開呢個副主席位，之前有唔少名人做過，包括李嘉誠、包玉剛，同埋港英年代嘅行政局大姐大鄧蓮如，個個都好有quali！
另外，中銀香港噚日同傳媒聯歡，八方都有去，同中銀新任副總裁高迎欣同枱，高副總原來係西安人，佢同八方講解西安文化歷史，如數家珍，佢話去西安旅行最少逗留三、四天，記得要去睇吓陝西博物館同半坡遺址。若是女行家，一定要去乾陵，欣賞武則天嘅無字碑，感受吓呢位中國唯一女皇帝嘅氣魄。
傳真︰2623-9278
電郵︰[email protected]