由韓國偶像男星姜東元及趙瀚善主演嘅校園愛情片《愛上蛋白質女孩》下星期將會喺香港上映，由模特兒轉做演員嘅姜東元，重憑呢套戲成為韓國年輕新偶像㖭。
雨中邂逅
《愛》片改編自網上小說《狼的誘惑》，姜東元話接拍呢套戲之前已經睇過原著小說，佢話最難忘係同女主角李清娥雨中邂逅嘅一幕，當時佢同一班學生打交，突然走入李清娥把遮入面避雨，兩個人四目交投，即刻過電。
導演金泰均曾經執導電影《火山高校》，雖然今次《愛》片以描述三個年輕人嘅愛情為主，但亦加入咗唔少動作場面，姜東元大爆拍檔趙瀚善拍攝其中一幕向佢起飛腳嘅戲份時，竟然唔覺意一腳踢中佢嘅下顎，痛到佢差啲標眼水，唞咗好耐至開到口講嘢。
姜東元接受訪問時話，由於出道短短兩年已經成為人氣偶像，所以成日都俾狗仔隊跟蹤，令到佢增添唔少壓力；提到電影，佢話好鍾意香港影星梁朝偉，佢好欣賞偉仔演技好，又大讚佢嗰對識講嘢嘅電眼，估唔到偉仔嘅電眼連男人都唔放過！