房委會負責領匯上市嘅產業分拆出售督導小組喺過去一年，一共開咗十三次會，主席陳家樂同成員單仲偕嘅出席率都係百分百，舊年宣告搶救領匯上市失敗前，喺十二月七號、十一號同十九號召開臨時會議都仍然「冇甩拖」，雖然最終依舊俾盧少蘭敲爛咗個老虎頭，但都無愧於心。
其他成員之中，最懶嗰個算係鄭恩基，但佢咁忙都出席咗四次會議，比起房委會委員伍仕福同鄭若驊好好多，佢兩個喺房委會大會會議嘅出席率係「零」，簡直可以同當年做緊庫務局局長嘅「靚女掌櫃」俞宗怡嘅零出席率睇齊。伍仕福可能諗住今年唔玩房委會就索性唔出席，鄭若驊則貴為交通諮詢委員會主席，可能要搞東隧加價，唔得閒理房屋問題啩？
傳真︰2623-9278
電郵︰[email protected]