自從新濠國際（200，臨時編號2981）1拆2後，股價連升兩日，浮番上先前批股價有餘。經紀黃話，睇落最開心都係細摩，原來新濠上周配售7000萬股（拆細前），當中逾一半由細摩接咗，睇嚟佢哋相當有信心。
新濠昨日最高曾見9.95元，收9.55元，升3.8％，收市價相等於拆細前的19.10元，較配售價18.25元升4.66％。
經紀黃又話，細摩在去年濠賭股熱潮中，最多曾經持有過新濠7％的股權，但在今年初已經沽得七七八八。新濠上周配股，市場議論紛紛，配售價最終以下限定價，但細摩今次肯食回頭草，而且重要揹到咁重貨，相信已經諗過度過先至落注。
有人幫新濠計過數，話新收購的項目，有賭場又有樓賣，可令公司資產淨值當堂升十幾個巴仙。
至於公布十六蒲項目的澳門實德（487）同埋變相增持希臘神話的奧瑪仕（959），股價雖然都係升，但就明顯動力放緩，兩股皆升3.7%，收0.84元。
慕容小初