呢幾日Game界俾三大新世代主機鬧得熱烘烘，E3焦點全部集中晒喺硬件度，本報亦已詳細報道過三大主機＋新手提機嘅特點，今日就集中講埋其他軟件參展商嚟緊嘅勁Game，等大家未投入新主機世界前，都知道呢兩年重有咩勁Games值得期待！
記者、攝影：許福合
E3花絮
跟東京遊戲展不同，E3雲集各地遊戲大廠，日、美各領風騷，港人最Buy嘅日本Games亦好有睇頭；唔計主機開發商，CAPCOM係每年E3最落力嘅一間，三、四個名作系列，全部係最拿手嘅動作Game，包括第一次公開試玩嘅《新鬼武者》，再搭幾款創意新Games，比世嘉、SQUARE-ENIX重要吸引。
《新鬼武者：夢之曙光》
前三集玩完「信長篇」後，今次輪到手下豐臣秀吉做壞人。主角不再用明星造型，而係取材自歷史人物，綽號「灰燼的蒼鬼」，高大威猛一頭金髮，揸住兩把大刀行走江湖。今次全球首次試玩，可見畫面又再提升一級，而且敵人數目並未減少，不得不佩服CAPCOM對PS2機能嘅掌握。而用過主角嗰兩把超大劍斬敵時候，的確係好爽快，而系統仍保留一閃、連續技等至爽玩法，而且重有如二代般嘅同伴系統，話唔定左馬介又再穿梭時空幫玩家！
《Killer7》
畫面跟一般「黑麻麻」射擊遊戲唔同，改為以紅紅綠綠顏色表達，相當之Colorful，畫面重好鬼美國漫畫Feel，即使行過見到都有深刻印象。實地玩過，動作＋射擊玩法好易上手，過場動畫同故事表達好新鮮，值得期待。
《FinalFight：Streetwise》
元祖《FinalFight》絕對係動作Game經典，新作《Streetwise》用上全3D製作，Cody再次登場，攻擊動作變化相當之多，玩法仍以街頭打爛仔交為主，不過畫風較為美式。
《BeatDown》
《GTA》咁出名，相信好多人都玩過，《BeatDown》玩法就有啲相似，又係舊式城市嘅劇情作包裝，畫面就屬原創風格，而且若論自由度或動作玩法，《BeatDown》都比較高，相信可吸引一班玩厭《GTA》嘅機迷。
NAMCO種類夠多
今年NAMCO展出遊戲類型較平均，動作、賽車、智力同RPG應有盡有，當中最搶眼嘅，肯定係PS2獨家嘅《SoulCaliburIII》。
《SoulCaliburIII》
跟同廠嘅《鐵拳》系列並駕齊驅，以刀劍互劈作招徠。新作加入3名新角色，未計隱藏人物已達25名角色，真係有排打。新系統有自創人物，由性別到武器都可自己話晒事！Fans要注意係今作屬PS2獨佔，即係唔會如前作般出現林克、再生俠等人物。
《MotoGP4》
電單車遊戲向來較少，NAMCO《MotoGP4》口碑唔錯，今集畫面更係超靚，玩慣《GT4》，轉吓口味轉鬥電單車都唔錯，而且速度感同對手有番咁上下，好耐玩。
《ArctheLad：EndofDarkness》
RPG遊戲《ArctheLad》最新系列《EndofDarkness》，今集畫面大進化，全面用上3D視點，喺城鎮度收集情報或戰鬥時，都逼真得多。
任天堂Mario跳舞撐場
雖然任天堂新機Revolution冇得玩，不過GC方面仍然好有睇頭，除咗王牌《薩爾達》外，重有幾款以Mario為牌頭嘅運動Games。
《DDR：MarioMax》
結合Mario與跳舞機嘅新遊戲，玩法同跳舞機一樣，玩家只要按照上下左右嘅符號節拍按下就OK，主要考驗玩家反應，睇玩家玩一場，就跳到興高采烈，比做運動還要健康。除此之外還有劇情模式同各式迷你遊戲。
《TheLegendofZelda》
之前一直消息唔多，今次終於喺會場有得試玩，不過就閒閒哋要排一個鐘頭以上先玩到。實地操控過變咗大人嘅林克，發覺動作有更多變化，3D場景亦好真實，排得辛苦啲都值得。
《MarioParty7》
出到第7集，《MarioParty》自然有其過人之處，可供多人同時玩樂，這一次加上更多小遊戲同更多個人劇情，放假開Party必玩！
《SuperMarioStrikers》
足球Games就玩得多，但這款《SuperMarioStrikers》仍然覺得好吸引，皆因落場球員全部換上Mario等任天堂角色，球員射球時還有機會使出必殺射球，玩同睇一樣有趣！
EA新Games賣動作
EA今年於PS3同XBOX360嘅發布會上，都被邀請上台講番兩句，證明其在遊戲界地位。新Games較矚目唔係《FIFA》之類嘅運動遊戲，反而係幾款動作掛帥嘅新Games。
《BatmanBegins》
這款蝙蝠俠新作採用全3D動作畫面，畫面氣氛承襲Batman嘅陰暗感，比較特別係一邊打，一邊變身成一隻大蝙蝠，攻擊力倍增，做到將人掃走嘅效果。
《FromRussiawithLove：007》
做得007，自然唔同拎住槍扮Rambo，玩家要利用各種技巧同裝備，入去探聽敵情，完成各式任務，而畫面尚算可以，厭倦經常打打殺殺就可轉吓口味。
世嘉《PSU》新作
SEGA今年E3其中一個最值得留意嘅，就係《PSO》後繼作品《PhantasyStarUniverse》，同樣以Online形式合作過關為主，道具、任務及角色類型將有所增加。
SQUARE-ENIX再拍迪士尼
由動畫大廠迪士尼同SQUARE-ENIX合作嘅《KingdomHearts》，將推出第2集嘅美版，故事背景係數年之後，玩落時發現連主角都變咗，變得有啲似大人，今集更加入迪士尼專有場景，畫面一流。
