指數變化輕微，但例牌都有一些大升或大跌的窩輪，當然都是交投不大嘅貨色。再過多一段日子，大部份都會變成廢紙。
中移動P輪4690：中移動P輪4690收1.7仙，升幅70%，成交5千份，金額85元，連一般經紀行的最低消費100元亦唔夠。唔使1張紅衫魚就可以造1個龍虎榜阿一紀錄，可能係經紀自己做，免佣，又或者經網上做，冇最低消費。
4690係淡友輪，7月上旬到期，行使價22.88元，正股（941）𠵱家27.10元，要喺個幾月內跌到22.88元，隻輪先至有得剩。正股要跌到咁低，好難咯，隻輪唔使作廢，亦係好難咯。
德昌C輪4669：德昌（179）輕輕升10仙，C輪4669就做咗龍虎榜阿二，收4.9仙，升40%，成交金額二萬幾銀。
隻輪8月初夠鐘，行使價8.38元，正股𠵱家7.45元，唔敢講隻輪一定死硬，但都係瓜多過菜，去年4月底至今，正股股價只有去年9月試過8日高過8.38元，而且只係高出少少。
新世界C輪3614：新世界發展（017）做番恒指成份股，雞屎一陣熱，收8.15元，低過上周五消息公布前嘅8.25元。昨日單日下跌0.15元。C輪3614收1.2仙，散69%，死火榜上排第1，成交金額唔夠4張金牛。隻輪下月尾到期，正股升唔上10元，隻輪就作廢，隻輪等作廢可也。
3614去年12月以每份87.8仙發行，掛牌後從來未試過高過發行價，炒家中好難搵到幾個係贏家。
章盛