曾蔭權跟胡錦濤手握手,親密接觸十一秒,不必時事評論員解畫都知,這個高姿態身體語言的含義。雖然曾蔭權做硬特首,是米已成炊的既成事實,為了讓七月十日的特首補選不致太過悶出鳥來,政治騷,還是應該係咁意,都要做一下,以堵塞諸公譏諷造馬之口。個騷點做好?唔使搵顧問公司,更加不要重蹈維港巨星匯的覆轍。叫曾公下令林D8食腦砌掂佢,為庫房慳番幾百萬,可以考慮:
叫曾蔭權跳吓草裙舞,趁六月春夏之交時分,忽然宣稱健康唔多好,又未至差,總之欲拒還迎,為新的特首能不能做晒兩年,構成新的危機。香港人本來唔關心七月十補選的,都會八卦估吓,甚至幫曾蛇搵高人算吓命,介紹神醫畀佢把脈,請風水佬去前港督府,挖吓地底有無邪符魔咒諸如此類的東西,總之日日有頭條小道消息,八足整個五六月,hot過大長今。曾蔭權做慣鐵的衙門,口面慣性鐵餅一塊,很難跟群眾打成一片。雖則七月十不是全民普選特首,曾公一樣可以做親民政治騷。肥彭蛋撻店今個月尾就要結業,曾蛇最好從今日起,日日去買蛋撻,跟街坊閒話家常,一邊吃蛋撻,一邊握手握足十一秒,保證這種作風比肥彭當年更能收買人心。蛋撻店會執,曾蔭權坐底有兩年特首做,朝朝歎完鴛鴦蛋撻才去聖堂祈禱,顯示重視老區人情,唔係淨識推銷西九。新特首夠晒街坊,唔使公關粉飾,親民騷的得分,應該險勝睇搶包山的唐英年一個馬鼻。
懶得做騷亦得,費事跟七一撞期,七月十直情當無事發生,香港人如常趁周日返東莞叫雞,去羅湖城腳底按摩。色即是空,這個行政長官,橫豎得兩年貨仔,短癮得很。首長,長個屁。