任三招一出,熱錢走夾唔唞,本港銀行亦即時加息半厘。今個禮拜二,港股在外圍大升之下都「無情情」大跌近200點,當日問勻晒都唔知乜料,家吓先恍然大悟。
雖然有熱錢流走,息口又升,但噚日港股不跌反升,中段時恒指更升過120點,收市13698,升71點,成交多番,有154億元;期指更強,升81點,收13678,低水20點。
人民幣遲早升值,金管局推出雙向兌換保證,係未雨綢繆,一來可趕走炒作的熱錢,二來可將人民幣升值的影響減到最低。不過,人民幣一日未郁,熱錢都會捲土重來。原本估計要到今年第4季人民幣先會升值,但家吓形勢愈迫愈緊,看來未必可以拖得到第3季,可能6月底前就會有動作。
港股調整是否已完成,等多一兩日就可確定,個人睇法較為樂觀,恒指有機會重上14000至14300呢啲位,而整固完成後,下半年可升破徘徊區阻力,創出今年新高。
升破降軌阻力
益安國際(082)果然破位而上,噚日一早已裂口高開0.73元,午後搶上0.77元高收,升7仙,升幅10%,股價同時升破10日線、20日線同降軌阻力,且有大成交配合,短期上升目標0.90元,中線可見1.20元。
今年3月,益安宣布收購五礦營口中板鋼鐵廠後,股價曾一度急升到1.10元水平,其後原大股東淡出,且一路沽貨,益安股價遂反覆回落,而收購文件遲遲未出,股價遂跌穿0.70元,近日才回升。
不過,益安剛宣布執行董事委任,其中兩位都係五礦的高層,分別係董事長李明克同總經理趙松一,五礦要員入局,消除了市場對收購的疑慮,而市場又有消息,話收購文件在月底前可發出,到時就會開車。
益安轉型,收購的鋼鐵廠產能正急速擴充,由去年每年120萬噸增到今年的200萬噸,生產的熱軋中板,市場供不應求,去年係淨進口,以06年預計益安所佔的3.6億元盈利計,計入收購所發行的新股及配售的股數,即使股價上升到1.20元,PE亦僅6.7倍,仍係好吸引。
郭兆誠