SONY同微軟都各有唔同理由急住推出新機，PS2機能方面已經見底，甚至比XBOX還有所不如，所以PS3推出愈早愈好！但今次PS3進度就稍為落後，連Game都無得試玩，參觀者排個幾鐘頭隊，入去除咗睇一段Trailer片外，就只能隔住個玻璃罩遠眺PS3，不期然心中叫搵笨！
睇三大新主機，論外形，似乎以PS3變得最少，有啲同PS2差唔多嘅感覺，同樣可選擇橫放或直放，不過橫放時，因為機面用上弧面，唔可以放遊戲碟喺機上面。從會場所見，PS3看來會有3種顏色，銀、白同黑色，其中黑色重係鋼琴面，好搶眼！
BD碟達54GB容量
SONY特別強調PS3使用Cell處理器同RSX繪圖晶片高效能，從示範中畫面的確能變得真實豐富，不過這是新機起碼要求，唔會令人意外，筆者對PS3其他功能比較有興趣，除咗支援PS同PS2遊戲光碟外，更採用Blu-ray光碟（BD），這種新制式光碟容量可高達54GB（現時單面DVD為4.7GB），可預期遊戲內容可幾何級數提升，同時亦能夠欣賞到高解像CG動畫，所以畫面輸出方面亦支援720p、1080i同1080p制式，配合2組HDMI介面輸出，只要閣下電視能夠跟得上，絕對享受前所未見嘅超靚畫面。
PS2瘦身版其實已提供網絡支援，而去到PS3更升級成GigaEthernet網絡，同時亦全面支援無線網絡，有齊802.11b/g及藍芽，方便接駁Router或PSP之用，而手掣更會推出藍芽版本，打機就唔使再被接線所束縛，最多更可支援7個藍芽手掣，即PS3可供7人同時玩！可惜SCE一直未有於香港提供網絡遊戲服務，令網絡功能變得可有可無，網絡遊戲已經係大趨勢，對手Live亦算搞得唔錯，還不趁新機推出急起直追，就太遲喇。
記者意見
睇過3部新機後，任天堂部Revolution因為資料太少，畫面到性能都難以評論，而PS3同XBOX360某程度上非常相似，在不斷提高處理圖像能力嘅同時，亦同時力求身兼影音中心，打機、睇片又可睇相，從兩機皆注重HD畫面就可略知一二，另外網絡支援亦係兩機重點之一，不過XBOX360憑Live網絡，似乎略為佔優。
PS3PROFILE
Cell處理器：3.2GHz（PowerPC-baseCore）
影像處理器：RSX
光碟機：CD、DVD、BD
擴充介面：USB2.0×6、WiFib/g、Bluetooth、Ethernet、2.5"硬碟插槽、光纖
記憶卡介面：MSDuo、SD/Mini、CFI/II
特別功能：支援1,080pHDTV、SACD音樂碟、HDMI數碼影音插頭、向下兼容舊有PS、PS2遊戲