煲呔呢幾日肯定無心睡眠，日日喺府邸維多利亞宮（VictoriaHouse）諗吓坐正特首之日，何其風光？當然呢一頭半個月就有少少風險要冒，八方相信佢咁醒，唔會好似楊鐵樑當年咁，慘被新華社香港分社社長周南滑鐵盧，賠了夫人又折兵。
煲呔今晚會同班傳媒高層晚宴，之後就唔再有特別活動，連下星期同45條關注組以及民主派人士講政改，都由梁愛詩同林瑞麟負責，佢唔得閒見啦。
咁又係，特區忽然個幾月冇咗阿一同阿二，好多嘢要交帶吓，加上一宣布唔做CS，就馬上進入參加補選特首嘅遊戲，佢個競選總部同心戰室亦會強勢曝光，肥龍許仕仁、攞命陳以及煲呔之友亦會相繼蒲頭，到時你唔搵佢哋，佢哋都會送上門，明知贏硬都要扮吓嘢。當年老董競逐連任，對所有傳媒包括《蘋果》都好友善，無他，要贏得好好睇睇，煲呔只會過之而無不及。
傳真︰2623-9278
電郵︰[email protected]